藝人朱晨麗（朱朱）在好姊妹陳煒（煒哥）婚宴上成功搶到花球，朱朱回覆說：「梗係開心啦！好Lucky好感恩。」她笑指在婚禮上，新娘子陳煒已經攞咪講定叫她認真去接花球，她說：「現場又冇幾個係未結婚，我係其中一個，冇乜對手，大家都畀咗好多機會我去接，咁接到花球都開心嘅。」她坦言參加過不少婚禮，今次也是人生第一次接到花球：「尋晚全部都係熟朋友，玩得好開心，接到花球都係一個好好嘅祝福，希望未來日子有個好嘅緣分，希望好似煒哥咁幸福，有個完美老公，佢兩個真係好Sweet好羨慕。」
朱朱經常與煒哥及其夫婿食飯，她說：「雖然嗰時佢哋未結婚，但已經係模範夫婦，見煒哥好Sweet好冧，佢對老公非常好，對朋友又好細心，作為一個閨蜜，同佢哋食飯中都學習到好多，希望將來自己都可以好似佢哋咁恩愛。」婚禮上煒哥可有給她介紹筍盤？她說：「冇，冇介紹啲咩筍盤，現場全部都係老友同公司同事嚟，冇人介紹，唔緊要啦，我相信緣分嚟嘅時候自然會到嘅。」
東網網站 : https://on.cc/東網Facebook專頁 : https://www.facebook.com/onccnews/
