內地人氣經典古裝劇《後宮甄嬛傳》播畢13年至今仍相當受歡迎，更被封為古裝劇超強霸主，日前舉行《甄嬛愛不停－甄嬛傳小主節晚會》更令當中多位「妃子」人氣再度翻炒，當中要數「華妃」蔣欣頻頻上熱搜。幕後拍攝花絮及秘辛亦同時被翻出，劇中令人又愛又恨嘅「華妃」，據傳導演起初屬意之人並非蔣欣，而係女神范冰冰。
蔣欣曾於節目《天下女人》中透露，自己原本飾演嘅角色只係「曹貴人」，但佢試戲時認為當時扮演「華妃」嘅演員「演得不對」，因此立刻向導演鄭曉龍爭取想試演「華妃」。起初導演不以為意，認為佢冇「華妃」氣質，但當蔣欣拍枱大吼時，導演立刻就被佢嘅氣勢震懾住，幾日後佢就收到劇組通知表示將由佢出演「華妃」一角。
對此，蔣欣坦言其實導演一開始係希望由范冰冰出演，並睇中范冰冰畀外界一種「豔壓群芳」感覺，無奈對方實在太忙先放棄。而所幸蔣欣表現冇令人失望，將「華妃」詮釋得十分到位，一句經典台詞「賤人就是矯情」不僅讓導演刮目相看，更令自己因此爆紅，從無名小演員躍升一線女星。
東網網站 : https://on.cc/東網Facebook專頁 : https://www.facebook.com/onccnews/