Ray Online｜羅淑佩自稱「瘦底」　但「通個香港都話我肥」

新官上任嘅文化體育及旅遊局局長羅淑佩除咗鍾意追星，仲鍾意做運動。不過，佢話「通個香港都話我肥」，其實自己係「瘦底」，引述好多市民見到佢真人，都話「局長，原來你咁瘦，你都唔係好肥啫」。

宗旨是工作時不要想升職

羅淑佩噚日出席商業電台午宴同主持對話，話前一日先做完16型人格測試，大方分享自己嘅人格係「ENFJ-A」。根據網上解讀，呢個人格嘅人可以冷靜解決問題，好積極同有自信，好適合做高官。羅淑佩呢2年嚟升職3次，被問到點解升職咁快，佢透露宗旨係做嘢唔好諗升職，唔好為升職而做，只著眼於做好崗位同覺得啱嘅事。佢形容公僕唔係一份工，而係一份使命。

羅淑佩係外向型人格，簡稱「E人」，主持話正正同羅淑佩鍾意嘅歌星陳卓賢英文名Ian同音喎，引起全場歡呼，羅淑佩笑言「一講輕鬆啲，又係伏嚟」。講到陳卓賢，前排喺《叱吒樂壇流行榜頒獎禮》勇奪多個大獎，不過錯失咗我最喜愛歌曲獎，午宴主持人陳志雲大爆頒獎禮當晚，將現場投票權授權畀咗羅淑佩。