張美妮曾考慮淡出幕前　《異空感應》令她重拾初衷

藝人張美妮在無綫劇《異空感應》中，展示喊功，喊到觀眾都戥她可憐。美妮發覺只要不顧個樣，投入地去演，自然會有好效果，她說：「今次真係喊好多，好似天台場戲，就算導演拍緊我對鞋，流淚繼續流緊，工作人員叫我唔好喊住唔好嘥眼淚，但我唔想放鬆，拍完好滿足，原來我都可以咁入戲。」笑言一入戲幾多眼淚都有，不會眼乾，「我諗我拍《異》流咗一公斤眼淚。」

美妮自從誕下囡囡後，一度考慮過淡出幕前，不過經過今次之後，令她過足戲癮，發覺自己真的好鍾意演戲，得到的滿足感多多錢也買唔到。尤其當女兒升小一要返全日學後，感覺無所事事，「囡囡開學時我唔係好適應，因為無嘢做，原來係我需要個女，多過阿女需要我，依家好想多啲自己嘢做。」

一向凍鹷有術的美妮，日前便出席郭晉安名下集團上市活動，她分享扮靚心得，保持幕前工作人自然會靚，「有一輪冇做幕前，發覺臉黃又有肥肚腩，個人都唔會開心。有工作之後，開始做番運動和護膚，由內至外都精神曬，有日阿女話『今日媽咪好靚，好鍾意媽咪咁靚。』，人可以幾差狀態都得，只要努力，就一定做到最好。」

東網網站 : https://on.cc/東網Facebook專頁 : https://www.facebook.com/onccnews/