洪永城（Tony）和梁諾妍（Inez）的第2個小公主「洪啤啤」（Beryl），已於前天（21日）在荃灣一間醫院出世，趕得切成為「白羊女」。小B女非常健康，重7磅2，Inez今胎開刀分娩，當聽到妹妹的喊聲，Tony和Inez感動到喊出來，兩口子現時最期待連同愛犬，一家五口一起跑馬拉松。
Tony也在社交平台代初生B女訴心聲：「頭先我都聽到啲姐姐話叫我Sir face 2.0 ，我其實有啲唔開心，因為我想似我靚靚嘅媽咪多啲，我一定要做Mum face。我知道我喺媽媽肚入邊時候跳跳紮，令到媽咪瞓得唔好，同埋原來我自己都幾有肉地，頂住媽媽個胃，大個咗我一定會好好照顧媽咪同佢個胃。
我好高興嚟到呢個家庭，我有個好為食嘅大家姐Molly（愛犬），又有一個非常好動嘅二家姐，所以我決定傳承佢兩個嘅優點，成為一個又為食又好動嘅三妹，同埋我偷聽到爸爸話一定會帶我周遊列國去旅行喎，好嘢。」
（即時娛樂）
