上期講到熊大打爛咗由細儲到大的兔仔錢罌，將入面的錢拎去買金。可能大家會覺得買金好「老土」，大媽先會去買金。不過其實而家買金都好年輕化，好似熊大妹妹Choco咁，由細到大都對黃金情有獨鍾，可能因為佢天生港女性格，最鍾意買名牌，一見到名貴嘅嘢都會雙眼發光。不過Choco好奇點解熊哥哥都會買金。
Choco：熊哥哥，你最近做咩成日買金？
熊大：我買金主要係為了投資。買金可以保值，又可以對抗通脹，何樂而不為？
Choco：哦，原來熊哥哥為了儲起和兔兔姐姐的老婆本！不過金價成日上上落落，點睇得出而家係入市好時機？
熊大：金價今年上半年主要係1,240至1,325美元區間上落，呢個水平係過去5年較高的區間。早前金價成功突破了呢幾年的大型橫行區。技術上睇，金價新一輪升浪將會起動。所以金價一突破1,350美元後，好快就上至1,400美元，最近仲升穿埋1,500美元、1,550美元。預期金價每盎司1,600美元都就快到。
Choco：點解金價突然升得咁急？
熊大：金價急升主要有幾個因素：一、中美貿易戰持續，引起市場恐慌情緒。雙方談判一日未結束，市場都會擔心加徵關稅引起的惡性通脹問題，令市場避險需求升溫；二、全球低息環境。市場預計聯儲局年內仍會減息，減息預期升溫，令美匯指數回落，利好以美元計價的黃金；三、地緣政治不穩。沙特阿拉伯石油設施遭到攻擊，當地局勢不穩，亦成為推升金價的因素。
Choco：咁如果想投資黃金，除了買金飾，仲有咩方法？
熊大：其實市面上投資黃金的工具有很多，例如實金、紙黃金、黃金ETF、黃金股，又或是黃金掛鈎存款等等。
Choco：買實金同買金飾又有咩分別？
熊大：金飾定價係按金價再加上手工費，即係未賺價就已經先蝕手工費。而買實金，即係買金條或金粒，呢個方法好處係有嘢喺手感覺比較實在，得閒拎出來睇都得。不過儲存實金好麻煩，可能要放在保管箱，到時又要比保管費。
Choco：紙黃金呢？
熊大：如果覺得保管實金麻煩，可以直接在銀行開個紙黃金戶口。不過要留意，沽出時是無法提取實體黃金，只能提取相應黃金價值的現金，屆時就會出現買入同賣出的差價。
熊大續說：再簡單一點的話，可買入黃金ETF（即交易所買賣基金），其走勢跟足金價，買賣亦相對方便同快捷。
Choco：黃金股呢？市場上有直接與金價掛鈎的股票嗎？
熊大：股票是不會跟足金價走勢，只係跟金價有密切關係。如金礦股、金飾股，它們不是直接與金價掛鈎，只係其走勢跟金價的方向基本上一致。
Choco：咁買實金好似最穩陣！
結果，Choco都學熊大買金，仲要係買金粒，原因係方便佢隨時拎出來睇，得閒又可以逐件摸一摸、數一數，啱晒佢鍾意欣賞貴嘢的性格。
留言 0