【娛樂評論】TVB藝訓班抄《造星》　《考有Feel》係翻版《獎門人》？

電視大戰，隨住曾志偉歸隊TVB開始，而且立即遇上ViuTV 5周年、口罩小姐競選，以及Chill Club頒獎禮，令電視圈好耐都冇咁熱鬧過。而由曾志偉改革綜藝節目計起，已經差不多有一個月，由起初見到對方得4點收視難視為對手後，到近日名正言順表示，新一屆藝員訓練班會仿傚《全民造星》製作。此舉有如你都要搵藝員扮姜濤一樣，好明顯係人哋掂先跟啦。

這種變相肯定，總好過到呢刻仲死撐自己係全港最強，人家完全唔掂，再講落去都是無補於事。要明白知恥近乎勇，雖然講到明抄都真係幾「恥」，但市場證明觀眾喜歡看這類節目，要順勢做一個類近的亦無可厚非，加上TVB的觀眾層大有可能未接觸過《全民造星》，以此模式製作選秀節目可能極具吸引。

回想當日TVB都跟台灣的《超級星光大道》，複製了一個《超級巨聲》，效果亦相當不錯。始終承認對手比自己強，都算甦醒的第一步，總好過繼續沉醉於做睡獸。而且這是捧新人節目，為幕前帶來不少新面孔，總好過今時今日仲叫金剛歸隊咁無新意，除非你好懷念他的半鹹淡廣東話。

至於ViuTV方面，遊戲節目《考有Feel》已經播映完畢，節目派出Mirror惡鬥Error，大獲好評不少人晚晚追，單是睇兩隊人如何在遊戲上出茅招已經夠過癮。不過有網民就指出其實所謂《考有Feel》，咪即係當年《獎門人》嘅遊戲節目，其中一個更加是「超級無敵大電視」翻版。甚至有人指以人體五感去玩遊戲，早在2012年就有個由錢嘉樂、金剛、洪天明主持的《五覺大戰》，如出一轍冇新意等等……

的確係，遊戲節目根本大同小異，你可說《考有Feel》是《獎門人》變奏，又可以話部分遊戲根本取材自《Running Man》，至於《五覺大戰》，概念更加是錯不了。既然《考有Feel》咁成功，曾志偉又係咪應該要急急重啟《獎門人》呢？

《全民造星》可以抄，但《考有Feel》就想抄都唔得，因為關鍵並唔在於遊戲好唔好玩，係新定係舊，重點係咩人落場玩。成班偶像男團Mirror落場，個個都搏到盡玩到癲，連萬人迷姜濤都零包袱，又叫又咬又爆鹹濕，好笑到不得了。加上Error以茅見稱，為節目增添爆笑位，好睇好多。

試想想如果TVB都來個《考有Feel》，主持就當你曾志偉、錢嘉樂、林曉峰回歸，然後落場的繼續是元祖級玩家洪天明、吳嘉樂，新少少的有阿Bob、麥美恩、農夫，稱得上後生仔的馮盈盈、戴祖儀……唔夠？再加啲歌手，周柏豪、JW、菊梓喬……數完一輪，恐怕節目都要改名做《考冇Feel》，因為TVB最抄唔到嘅係Mirror同Error。

撰文︰余建

Facebook專頁︰https://www.facebook.com/Stupid.View