34歲吳沚默演活三孩之母　為角色設計「靚得嚟有啲娘」造型

由 陳家樂、陳曉華、阮浩棕、譚凱琪主演的TVB劇集《異空感應》，昨晚（12月6日）第二個單元個案正式落幕，真兇竟然是三孩之母阿麗（吳沚默飾）。當年在《老表，你好hea！》中扮醜成名的吳沚默（Momo），被不少網民大讚有女人味：「個阿媽好正」、「好有人妻feel」、「呢位媽媽好靚女」。

Momo今次雖然飾演三子之母，但由於太後生便當媽媽，因此每次現身均是悉心打扮，除了會穿透視裝、遇有Bling Bling裝及毛毛上衣。Momo接受tvb.com訪問時，坦言這是她消化過角色背景及人設後，主動向監製Amy姐提出的意見：「因為呢個角色未成年已經搞大咗個肚，其實加加埋埋同我真實年紀唔算爭好遠，所以我同Amy姐講，我哋不如試吓扮後生啲嘅媽咪，令人覺得佢好似好唔甘心、亦未ready做媽咪咁。因為佢身份問題，所以貪靚得嚟又唔可以青春同Fashion，要有少少娘娘地。」

34歲的Momo不介意飾演三子之母，而且還大呼好玩：「我真係第一次演有三個仔女嘅阿媽，之前最多都係懷孕，未試過生咗出嚟。其實做媽咪我係一啲問題都冇，我覺得呢個角色好有發揮。」對於被指劇中不少肢體語言都母愛滿溢，Momo竟笑言與星座有關：「可能因為我巨蟹座啦，如果相信星座嘅話，巨蟹係好有母性嘅，我喺屋企都好『媽咪』，好囉嗦，會管番阿爸阿媽轉頭。」

除了造型，Momo在角色心路歷程及變化亦有發揮空間。最初當大家還未得悉她是兇手時，只覺得阿麗淒涼、軟弱又無助；不過當她露出真面目後，不少猙獰及叛逆面孔均相當到位，尤其不停數落老公的一場。Momo認為角色是個悲劇人物：「其實呢個女人一直活得好壓抑同唔甘心，佢覺得自己犧牲咗成個人生去為咗頭家，但到頭來二妹咁對佢。其實佢殺二妹時冇為意同諗咁多，只係因為佢唔太叻又冇乜耐性，所以殺咗個女自己都唔知點算好，所以見到阿女屍體時嗰種傷心係真嘅。」