填詞人黃偉文（Wyman）一直為無數位歌手填詞，就連已故的張國榮梅艷芳等巨星都有屬於Wyman填詞的金曲，偏偏原來仔從未能與「阿姐」汪明荃合作，直至近日阿姐開演唱會出新歌〈Make My Day〉，找來林家謙作曲、黃偉文填詞。Wyman昨晚（14日）IG出po分享，表示要「報28年前的恩」，又形容今次合作終於令他母親改觀：「阿媽，我終於『入流』啦。」
Wyman昨晚發文表示：「關於那個我要『報28年前的恩』，兌現自己開給阿姐張cheque的小故事。可能大家近來都有聽到汪明荃小姐親自講過了。甚實，這首歌我非寫不可。還有一個連對汪明荃本人我都未講過的理由。」
Wyman憶述關於自己與媽媽的故事。「如果你有睇Concert YY，你可能會記得我講過，我阿爸阿媽咁多年嚟其實都好似唔係幾知我係做緊啲乜嘢嘅。好記得廿幾三十年前，有一次我阿媽問我：『你成日閂埋房門寫寫寫，其實你係做乜㗎？』我話：『阿媽我而家做緊填詞人呀。』阿媽話：『咁你有冇寫過汪明荃？』我話：『未呀。』阿媽再話：『咁你應該都係渣渣地，唔係好入流。』」
Wyman續道：「佢掉低呢句咁狠毒的說話就行開咗。從此之後，再沒有問過我一句有關我嘅寫詞工作。大概喺佢心目中，呢幾十年無論自己做過乜，都係唔計數嘅。總之一日未寫到汪阿姐，呢個仔都係流流地、好打有限。」今次終於合作，難怪Wyman興奮到出po。「所以，好開心好開心，喺入行寫詞超過三十年後……阿媽，我終於『入流』啦。」Wyman又用寫英文寫道：「Mom, after all these years, I hope I can FINALLY make you proud. 」
Wyman發文一出，就連阿姐新歌作曲人林家謙都有留言：「我阿媽應該都感到身受。」另有留言提到：「N年前Wyman同汪阿姐喺商台一齊做節目，做到最後嗰晚，黃生送咗對耳環俾阿姐，佢仲話『嗱，講明呀，唔係真鑽石嚟架，係假架，係假架！』」Wyman亦有回應：「就係嗰晚閂咪之後，臨走之前，我同佢講：『你幾時需要歌詞，可以考慮吓我。因為我好想幫返你。』大概二十八年前左右啦！」
留言 0