祝文君出殯　圈中好友傷感送別

藝人祝文君上月因肺癌病逝，享年55歲，今日（26日）於寶福紀念館出殯，其丈夫陳忠建及女兒陳凱瑩一早到場打點。藝人好友安德尊、阮德鏘及劉桂芳等也有到靈堂送對方最後一程。約中午12時許儀式完成後，女兒身穿孝服捧着祝文君的遺照與父親及親友步出靈堂，神情哀傷。

安德尊受訪時表示與祝文君相識30載：「我哋係拍電影識，當時都未入TVB。（知唔知佢有病？）佢唔畀朋友知，我哋都唔知。（最後一次見面係幾時？）去年底公司頒發長期服務獎畀佢，當時佢冇乜嘢，仲好精神，只係把聲有啲沙啞同攰少少，所以察覺唔到佢有病。最後合作係劇集《痞子殿下》，大家經常開通宵，會一齊坐低傾偈，睇唔出佢有咩唔舒服，佢太收埋，想關心都冇得關心，有啲難過，收到消息好突然，畢竟佢太後生。」他指對方熱愛工作及社會服務，最難忘是對方經常笑：「係個開開心心，冇乜憂愁嘅人，好樂觀，我叫佢做祝姑娘，因為覺得佢好似個小姑娘咁好開心，唔會為難人。」

東網網站 : https://on.cc/東網Facebook專頁 : https://www.facebook.com/onccnews/