重組防線後6場失13球，阿迪達想再變陣都難

英超榜首大戰，阿仙奴以1-4大敗予曼城，將爭標主動權拱手相讓。呢篇文唔會集中討論單單呢場波，因為阿仙奴由榜首領先多分，到而家多踢2場下僅領先2分嘅困境，佢哋近四場英超已經冇贏過波，原因在於球隊防線嘅傷情，特別係中堅沙列巴（William Saliba）未必能夠喺今季復出，影響阿仙奴嘅組織同防守。
喺榜首大戰之前，阿仙奴十場比賽的確冇輸過波，但當中包含近幾場比較肉酸嘅和局。上個月歐霸十六強次回合，沙列巴、冨安健洋先後傷出，當中沙列巴有機會提早收咧。之後5場比賽由賀定補上中堅位置，同加比爾拍檔守住防線，可惜失球多達9球之多，未能提供足夠信心。

論傳控體系，沙列巴係阿仙奴常規主力入面，傳球成功率最高嘅球員（91%），亦係15至30碼中距離傳球次數最多嘅球員（31.5次），唔單止表示球隊需要佢嚟保持後場嘅球權，當面對主打壓迫戰術嘅球隊，沙列巴亦能夠喺受壓嘅情況下，搵到將皮球運送到安全地方嘅路線，呢方面嘅能力喺對曼城呢類英超強隊嚟講至關重要。
被曼城大勝一役，主隊6個對阿仙奴中路嘅縱向突擊，處處痛擊沙列巴缺陣後留低嘅缺口。而以佢哋一隊嘅人腳，只得賓韋治、賀丁能夠出任中堅。

當然，佢哋仲有另一個選擇，就係棄用賀丁，用賓韋治同加比爾合作打中堅，仙真高作為奇兵出任右閘。季初加盟以嚟，仙真高企穩阿仙奴左閘一席位，但有別於傳統喺外圍插上進攻嘅方式，中場出身嘅仙真高更擅於內收到中路，協助球隊後場同中場嘅傳導，大局觀同視野都優勝於大多數閘位球員。
雖然賓韋治用球能力唔差，能夠改善阿仙奴後場傳控嘅問題，但要打咗成季右閘嘅賓韋治，突然打返中堅，臨場適應上一定有困難。而冨安已經確定提早完季，賓韋治更應該全力集中打右閘。同時，要仙真高臨時打右閘，用球習慣同防守方式上嘅改變，分分鐘令佢更加失去信心。
不過，保持陣型習慣同尋求改變，兩者之間永遠係艱難嘅選擇。阿迪達執教三年半以嚟，為帥一向果敢，喺球隊後防傷員眾多嘅情況下，隨時會拎出令人意想不到嘅變陣方式。以目前嘅狀態同形勢嚟睇，如果喺陣式上維持現狀，對阿仙奴相當不利。