古天樂接受大懲罰泳褲亮相　坦言工作令自己開心︰好有滿足感㗎

古天樂近年將重心轉向幕後工作，每年投資、監製多部電影，日前就罕有以嘉賓身份現身多媒體頻道BBO旅遊真人騷《尋泰記》，一連五集與兩位主持混血肥仔（曾達恩）和丁丁（丁彥均）玩轉曼谷多個地方，昨晚（19日）播出最新一集，他們便挑戰終極抽籤互相懲罰遊戲，將系列推至最高潮。

在節目中有不搞笑畫面，首先是「泰國天下一CEO」Bobbie挑戰坐「篤篤車」唱泰文版《幪面超人》主題曲，在後方食花生的古天樂反而成為全場焦點，期間更有當地婦人抱起小朋友衝向古仔身邊，搞到不明所以的古仔笑爆嘴：「做乜啫？做乜拎個𡃁妹過嚟？」他更笑住「模仿」對方：「我畀你啦，我唔養喇！」

節目中還有古天樂抽中穿泳衣的終極挑戰，混血肥仔等人安排了三款泳衣供他選擇，第一個選擇是沙灘褲，第二個選擇是滑浪防曬衣配三角泳褲，第三個選擇是一件頭連身平腳泳衣，結果古仔就揀了望落最多布的第三個選擇：「好吖，呢件啦！」現場見證的混血肥仔和丁丁立即企起來興奮鼓掌，丁丁更說：「古生做咗個英明嘅選擇！」而古仔激罕泳衣亮相震撼網絡的場面，混血肥仔就留在會員限定專區播出，未有在免費頻道公開，非常識玩！

另外，古仔亦在節目中談到「開心」這回事，他坦言工作已經令他非常快樂：「你哋都係啦，拍完一樣嘢之後會覺得『嘩，總算拍到喇』，好有滿足感㗎嘛，我諗過程就係最開心。（好少情緒？）我覺得冇乜嘢好勞氣，冇乜嘢好嬲，有時咪當笑話聽，即係用一個輕鬆啲嘅方法去面對一件事。」古仔更透露肯作客亮相BBO的原因：「咁樣幾好，新生代同我哋而家一齊合作，諗法應該更加長遠先得，所以我覺得都要嚟做一次個原因係，好好地體驗下喺唔同嘅範疇裏面應該可以發生咩事，就唔好話用一個觀賞態度，『好好玩好好睇』咁樣，點解唔上嚟試下做一次呢，呢個先係最緊要。」