正在熱播嘅Viu TV靈異探險節目《入住請敲門》第二季，特登搵哂泰國同馬來西亞嘅超猛鬼酒店嚟挑機，比第一季嘅恐怖程度有過之而無不及！今次就依舊搵番第一季嘅莫竣名同林婷做主持，但因為林婷喺第一季做咩都鬼殺咁嘈，超煩膠表現令唔少網民喺節目未出街之前已經俾哂負評！點知播咗好幾集，觀眾就認真俾佢嚇親啦！林婷大膽到好似「鬼上身」咁不斷淡定挑機各種都市傳說，佢究竟經歷咗啲咩呢⋯⋯
撰文：東方新地 ｜ 圖片：節目截圖、YouTube、Instagram、連登討論區
延伸閱讀：
第一季林婷未到戲肉就退縮
播第一季嗰時，大多觀眾聽到林婷個名都已經覺得煩，因為佢喺第一季嘅表現實在慘不忍睹，去到邊都大叫「好驚」、「唔得啊」，被唔少網民大鬧佢唔專業，真係細膽就唔好接呢啲Job咁話啊！相比起另一位主持人莫竣名自然得嚟又合理地淆底、間中爆吓粗嘅表現，真係差啲啦⋯⋯
第二季勇到觀眾嚇親
真係唔知林婷喺呢一年入面經歷咗咩，點解今季可以突飛猛進成咁，唔驚青、冇鬼叫，挑機不同都市傳說都不在話下！人又靚，把聲又好聽，林婷咁淡定冷靜噉介紹唔同猛鬼地方，反而令小編覺得更加心寒，隔住嗰芒都驚驚地⋯⋯難怪一眾網民都對佢負評轉正！
帶頭挑機馬來西亞雲頂
林婷喺第二季挑機出名超猛嘅馬來西亞雲頂酒店，冷靜勇敢嘅表現令網民激讚！其實嗰度早已發生唔少命案而幾乎半荒廢，林婷竟然要入住命案的樓層，又巡埋樓，最後仲要去到勁陰森嘅停車場查探！真係勇猛到小編都好佩服！
延伸閱讀：
留言 0