【香港郊遊002】簡單快速+靚景，龍蝦灣郊遊徑

呢條龍蝦灣郊遊徑，某日同fd行完都覺得幾有趣~
風景極佳、交通方便、難度唔高(我自己覺得)，重要所需時間唔長2個鐘內可以攪掂! 真係訓到中午食個lunch撩緊牙時身痕即興走返轉都ok!
有個咁好既option，就簡單幾隻字分享下啦~

行程概要:

清水灣道迴旋處至龍蝦灣路
馬術學校至龍蝦灣風箏場
龍蝦灣郊遊徑
終點 : 大坑墩燒烤場

交通

去龍蝦灣郊遊徑，可以係九龍東坐巴士91 / 16, 103 or 103M小巴係”下洋”落車，即係清水灣道迴旋處落車

之後就睇下你想由北至南or南至北咁行啦~

北至南係走入龍蝦灣路，會先見到龍蝦灣、馬術學校、風箏場等等，可以先睇到靚景同玩風箏先~但成段路都無補給

南至北係前行清水灣道至大坑墩燒烤場，好處係………………我唔知~因為我行北至南的~
如果想慳返行龍蝦灣路果段好長既落斜，可以叫的士兄載你到龍蝦灣，甚至直入到馬術學校開波行郊遊徑
不過，咁就似乎少左d樂趣了~
龍蝦灣古石刻一帶d水靚到好似地中海咁ga!!!!!

離開石刻向前行約3-400米會有一個無名小海灘，都係影相乘涼抖一抖既好地方~

再向前行就會見到馬術學校~

不過呢間學校不論佢係有馬定無馬，係騎兵定步兵都同我無關係，重點只係右手邊你就會見到大大個牌寫住「龍蝦灣郊遊徑」同「龍蝦灣風箏場」
其實慢慢行的話，上面所講ge龍蝦灣路已足夠妳行粒幾鐘
所以”兩粒鐘攪掂既行山”係由呢度開始計~

又唔使咁急上山住~

先沿指示牌繞過馬術中心後場，再行上去龍蝦灣風箏場先啦~

就算唔放風箏都唔緊要，廣闊既海景圓形大草地絕對會令妳心鄺神怡!
如果我仲讀緊大學，應該會同friend係度玩Campfire，成個山頭都聽到「程! 程! 程discount!」(正音: DSCHING DSCHING DSCHINGHIS KHAN)
d鬼佬行過就會問「你班食人族係度程乜Q呀?」
um~記住啦，行山時有d唔啦間既大聲音樂係好煩人ga!!

唔覺意係風箏場度hea得太耐，成4點鐘，係時候上山啦~

開波都無乜野，但20分鐘後，我越行就越發現有d問題……….就係我有d攰啦…….
有無咁虧ar!!!!!!!!! 行4個字ja wor!!!!!
開頭都覺得係自己鄧兆尊上身，但到40分鐘後就突然醒覺一樣野-----------我完全無行過平路! 一直keep住係咁上樓梯無停過!

原來呢條郊遊徑係一小時內高速直上山頂，途中全是大級樓梯，要到左近山頂先會有約1-200米平路比對腳鬆一鬆，之後又大斜路樓梯落山!

我行緊大奇蹟日果條恆生指數呀!!!!!!!

wei都好chur je! 咁都叫難度唔高?? 同叫d人比蚊咬用止血帶有咩分別ar??
放心啦~我係一個經常出門不在家的人，所謂出家人不打誑語，我唔會點你地ge~
樓梯太多喘氣，慢慢行就得啦~
重點係呢條路只有開始一段仔約5-10分鐘路被樹林蓋頂，其他全部都係開揚山路~

下晝行起上lai太陽剛被山峰所擋，路上清風送爽非常舒服~仲要一回頭就有西貢牛尾海橋咀島美景~

儘管行到索哂氣，但完全唔會覺得辛苦~
咩話，換句話講即係中午會曬到hihi?????
呢個山行個零鐘攪掂，你偏要自虐地正午時份行ge話我都幫妳唔到…………

過左山頂後就開始落山~
估佢唔到既係落山竟然係俯視整個清水灣的美景~
Wei使唔係上山同落山都咁開揚咁靚ar~

其實行山文我真係唔係好識寫，因為就係咁係座山度行ar行ar，另外就係飲水同吹水，唔通特登寫一段我係山頭上「唔該借借」咩
所以，由於時間既關係，我已經落到山啦~
第一時間就係去小食亭買野飲…………口渴到一分鐘對左一支寶礦力……………當時既感覺就同阿銀阿桂兩個一樣……….

最後就係講點走~

係終點大坑墩燒烤場沿馬路一直行多15分鐘就會去返起點既清水灣道迴旋處，小巴巴士的士悉隨尊便~

由離開風箏場開始計，16:15出發，去到燒烤場士多係17:45，成程hea下抖下，total都只係用左個半鐘!
一路上風景怡人，無分岔路簡單易行，唯一係連上近一個鐘石階有d辛苦law
之不過我呢d中年弱雞都得，大家都一定無問題ge~
呢條路真係簡單快行既首選ar!
p.s. 當日天氣其實超熱，我支水未到風箏場已消耗左1/3，大家記得預備充足飲料ar!

============================