韓國男團EXO成員的內地男星吳亦凡，尋日（31日）因涉嫌強姦罪被依法刑事拘留，事件之大已極速引起全球關注，有網友竟然突破盲點，發現原來內地搖滾天王汪峰正正就係尋日山西太原開騷，基於「汪峰效應」（即汪峰有重大決定公布時，必定會有大新聞發生），繼今年年頭鄭爽代孕棄養事件，今次吳亦凡捲涉嫌強姦罪將成為汪峰最大「戰績」。
今次醜聞引發連串事件，好似吳亦凡同上位小花楊紫合演嘅劇集《青簪行》，早前就已經被網爆推出無期，二人為劇集拍足一年，本身有指欲將吳亦凡被AI換臉後定檔本月上映，不過依家肯定冇上映機會，即令「#心疼楊紫」嘅話題升上熱搜。
另外又有唔少藝人偷偷進行「割席」，好似內地諧星李雪琴就將過往有關吳亦凡嘅發文刪除，連二人合照都冇得留低；編劇六六早年曾公開發文維護吳亦凡，如今佢都即刻出Post指自己睇錯人，明顯轉風向，人人喊打。
除咗吳亦凡外，早前被警方爆吳亦凡同都美竹有性關係，都美竹即被網友發現佢將自己個名申請註冊商標，申請日期為今年7月；另早年放出同吳亦凡床照嘅網紅Gina，亦將網名「小G娜」申請商標，同吳亦凡相關嘅女士都紛紛為自己「維權」。
另有內地消息稱吳亦凡可能涉其他罪行，因相關單位重視其事件，可能係打算將涉毒問題一併解決，而中國公安部禁毒局的官網「中國禁毒在線」亦轉發佢被拘留消息，令人有所聯想。此外，有爆料指事件涉及其他多位形象正面嘅藝人，雖冇指名道姓，但爆料者稱數量不少，會陸續有通告發出，吳亦凡表哥同佢都一齊拘留外，有網友爆料表示他手上有藝人「pxx」嘅相關「證據」，網友猜測有可能係同佢關係友好嘅潘姓男藝人同林姓男歌手，並傳：「元旦前會一錘定音的，證據和一些案發經過，警方會一五一十的通報。」
東網網站 : https://on.cc/東網Facebook專頁 : https://www.facebook.com/onccnews/