MIRROR打入日本市場！港版《大叔的愛》將於今年秋季日本播出

ViuTV自宣佈會翻拍日本大熱BL劇《大叔的愛》，搵嚟MIRROR成員呂爵安（Edan）兼盧瀚霆（Anson Lo）同型佬黃德斌一同擔正主演之後，劇迷們都非常好奇港版水準能否媲美日版！

港版《大叔的愛》中，Edan會飾演田一雄（原作：田中圭）、黃德斌飾演大叔部長KK，而Anson Lo就飾演同居密友凌少牧，三人將會譜出既搞笑又浪漫的三角戀。劇集將於下星期一正式首播，近日ViuTV都密密公開預告片及製作花絮來谷劇，而ViuTV亦堅持保留原作經典場面，內容幾乎跟日版一模一樣，只是集數由日版的7集增加至港版有15集。

據知製作《大叔的愛》的日本朝日電視台（tv asahi）亦非常緊張，早於2月港版《大叔的愛》舉行記者會時，朝日電視台已派出駐港記者到場採訪。去到近日，日媒更宣佈港版《大叔的愛》將於今年秋季登陸日本，並在朝日電視台旗下的「TELASA」、「テレ朝動画」、「CSテレ朝」三個頻道播出，似乎MIRROR有機會衝出香港，打入日本市場。消息一出，不少鏡粉都極為興奮，更留言預祝MIRROR進軍日本第一步成功」，有人更留言：「要在日本紅了」、「Edan 可能會俾人講有啲似高橋一生」。