有追開《愛回家》嘅觀眾都應該好鐘意睇大小姐＋送水輝嘅感情線！隨著佢地戀情逐漸進入穩定狀態，佢地嘅互動都越黎越Sweet，睇到一班觀眾每集都露出姨母笑容～不過佢地仲係發展緊地下情，每次都淨係可以留喺「覓雪琴室」入面約會，喺今集，佢地終於踏出琴室嚟個野外Dating啦～
喺琴室拍拖嘅生活都好苦悶，例如送水輝每次都係整「梳乎里」俾大小姐食、將一千塊拼圖砌完又砌等等⋯
當大小姐見到各位女同事喺度討論元朗大棠紅葉嗰陣，仲扮哂不屑咁，轉個頭就約送水輝去瑞士賞紅葉！不過送水輝就因為放唔低Philip仔，所以提議去大棠，結果佢地決定一朝早去大棠睇紅葉啦～大小姐喺大棠等緊送水輝期間，竟然遇上電視台做訪問！
而呢個主持人就正正係吳幸美，大小姐仲扮係日本人嚟睇紅葉，點知吳幸美都講得兩句日文，令到大小姐即刻露涵！原來佢係識講廣東話嘅～
喺大小姐情急之下，佢唔小心推跌吳幸美＋攝影師！點知成件事就發酵成為「大棠暴力事件」，仲被電視台出拼圖追緝大小姐添！！
呢一幕令到唔少網民都覺得好搞笑，仲覺得佢哋係曲線恥笑《東張西望》！今集有吳幸美客串，亦都係完咗網民嘅一個夢呀～而今集亦貫徹《東張西望》嘅作風，旗下藝員無論有紅白二事都必定要接受訪問，吳幸美都唔例外，破相都要接受訪問！！
當送水輝同大小姐決定衝出琴室，去午夜場睇戲嘅時候，竟然遇到爸爸同明星約會，爭啲俾爸爸識穿佢同送水輝嘅戀情！而編劇們亦都有跟返劇情，見到Terry仲係一身「IT狗」嘅裝扮，小編真係忍唔住笑咗出聲！
雖然佢地最後都係要留喺唔見得光嘅「覓雪琴室」，但係送水輝專登喺牆上畫咗一棵紅葉俾大小姐，不過呢種平淡又簡單嘅幸福唔知可以維持幾耐⋯
因為爸爸已經決定咗要介紹門當戶對嘅何公子俾大小姐認識，見到大小姐眼泛淚光、若有所思咁苦笑，真係Sweet得嚟又帶點傷感⋯⋯
一大班網民都希望編劇唔好拆散佢地，咁難得先可以互相確認心意，可唔可以寫到佢地光明正大拍拖呀～～～
Text：Girls Editorial
Photo Source：TVB
留言 0