濕凍天氣與意外頻生，由放棄一戰變得無比堅決嘅一隻馬。
猶記得收到大阪馬中籤，係喺金澤前往新大阪的 JR 列車，手頭上已報首爾馬嘅我，仍在三心兩意，到底係用哪一個作為做時間嘅比賽？無論自己嘅能力同時間分配都未有好好規劃，但同日喺各大群組都收到大量朋友中籤嘅消息，所以策略上立刻 book 了大阪馬起點附近嘅酒店，而最初嘅諗法係大阪馬作為首爾馬嘅最後長課。
回顧整個金澤馬嘅備戰過程，逃避咗大部分嘅長課，主要因為香港夏天天氣太熱，自己亦冇好好規劃訓練，無論身心都唔夠堅強；實力不足加上基礎不穩，所以金澤馬跑得不好（雖然有很多人恭喜 PB，但客觀嘅事實就係跑得唔好）。
失敗迎來了醒覺，所以金澤馬後，大部分時間都用嚟紮實有氧根基（大量嘅 easy run 同長課），而呢套訓練亦令我狀態一直冒升，台北同渣馬兩隻半馬，喺無練過任何速度課嘅情況下，單憑提升咗嘅體能都 PB完成，由本身大阪馬只係作為首爾馬嘅最後長課，慢慢對阪馬有了可以嘗試做時間嘅遐想。
賽前兩日，剛到大阪，因為氣壓緣故，亦可能因為體內炎症發作，左腳腳跟變得腫脹不堪，呢件事我並冇向太多人講過，除咗我十分信任嘅一個跑步群組，以及星期六早上遇見我瘸腿兀腳嘅兩位香港跑手，在此先感謝 Kristy ( @ytsirkgn ) 嘅強力消炎藥以及 Dicky ( @yim_dicky ) 嘅安慰。食咗消炎藥後，有返大約 6-7 成活動能力，所以我下午同晚上都分別約咗朋友食飯，晚上 Brian ( @meepobrothers ) 為我帶來喺會場買嘅 tape 帶，加上喺藥妝買咗腳箍、鎮痛貼同止痛藥，我相信能夠上線嘅機會接近 9 成了。
比賽那天，相信大家都已經在各個途徑得知大會安排嘅惡劣，從混亂不堪嘅指示，到滿佈泥濘嘅場地，已經提早兩小時出門口嘅我到達會場後一直搵唔到相關嘅行李區…唔太順利進入了行李區後，好快就被泥漿浸濕了鞋和腳，但已經係遇到嘅不如意事入面最微小嘅一單，同時因為心急奔跑，喺呢塊泥地整個人雙腳朝天跣低，所幸係並冇扭傷，只係屁股有啲痛。
千辛萬苦上咗線，但已經成了該區最後一批出發嘅人群，無論塞車，定是之前遇上嘅大大小小意外，我經已完全打消了做時間嘅念頭，小心翼翼地跑了頭兩 K，分別只能開出 535 和 452，比我原定配速總時間已經慢接近兩分鐘。
前往大阪中，我一直想起教練 Jeff ( @jefflawong ) 講比賽嘅完成時間可以分為四個等級，分別為合格、不合格、開心、唔開心；我心想怎樣也要跑一個合格時間，所以決定低標 sub330 完賽也好，姑且也叫 PB ，所以我便漸漸加至 440-442 去追回時間。
10K 後我食咗手頭上第一包gel，同時亦追過了 330 pacer，由於感覺好唔紮實，所以我決定一路跑、一路 scan 地下有冇跑手跌 gel，但一直搜尋不果。跑嘅過程入邊我開始思考最大機會出現嘅地方，會喺水站前後幾百米，大多數跑手會喺呢段時間食 gel，亦都好有機會喺呢個時間跌咗，結果呢個方法令我成功執到 4 包唔同嘅 gel。
雖然天氣惡劣，不過其實濕凍亦有一個好處，就係能夠保持心率偏低，令我可以維持到平均嘅輸出亦不致於體力透支，去到 35-36K ，分別遇到了同跑會嘅 Kenny 班長 ( @kennychan122 ) 和 Ted ( @tedrunnote ) ，佢哋鼓勵我加速，嗰時我睇錶知 5 分披應該大約 327-328 左右完成（以賽前目標嚟講真正高不成低不就），所以無特別加速，安全完賽就算了，最後完成時間 3:27:00。
完賽後陸續收到很多恭喜 PB 的訊息，我感謝各方好友對我嘅關注，原來有人追蹤時間係咁窩心，但我內心其實係有些失落，因為這是不合格嘅時間。
今季賽事嘅旅程還未結束；首爾，故事待續。
Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/
留言 0