MIRROR 7月紅館演唱會發生嚴重事故後，全團停工接近兩個月，近日各成員都陸續復工，包括昨日(21日)出活動宣傳劇集《季前賽》的姜濤、陳卓賢(Ian)、呂爵安(Edan)和邱士縉(Stanley)，意外後首現身，當然會被問到對事件的看法及感受，眾人都有備而來，不過尤其Stanley難掩傷痛情緒，回應時眼濕濕。
MIRROR紅館演唱會第四場發生事故，舞者阿Mo(李啟言)傷勢嚴重仍然留院。MIRROR四子現身活動時，被問到對事件的感受及看法，Stanley及Edan作主力回應。Stanley表示大家都想去探阿Mo：「一開始有問公司，我哋可唔可以探阿Mo，公司就話醫院有人數限制，我哋真係唔可以咁多人去，同埋阿Mo而家都未方便見大家住，所以我哋都只能夠透過公司去了解……我哋真係都好心急想知呢件事係點，好想知道佢屋企人係點、佢哋安唔安頓好。」說到他們的情緒輔導，Stanley說公司有安排：「因為事件發生嘅時候，公司好擔心我哋情緒係點樣，就請咗醫生顧問同我哋睇吓、檢查吓我哋有冇事，或者聆聽下我哋點樣。但都需要時間，你問我而家係唔係100%冇事？唔係。迷失就一定有嘅，因為唔知點樣，冇呀都係keep住整番好個情緒，需要時間慢慢繼續調整，公司都有因應我哋嘅心理情況，再安排工作量。」
Edan被追問專家調查報告時回應：「希望盡快有成件事嘅來龍去脈話俾大家知，因為知道大家每一位都等待緊。希望盡快可以知道。其實我哋都有keep住問公司，而公司都有同佢update，對上一次嘅答覆都係，『應該就快』……呢件事始終係一件……好震驚嘅事情，自己都用咗一段時間消化，同埋的確反思咗好多事情，而每一位兄弟，大家嘅……可能大家復原嘅程度都未必一樣。」對於現在復工的感受，Edan說：「所以大家都需要大約兩個月嘅時間，先至再見番大家，可能我哋成個團隊反思就係覺得，難得我哋有我哋嘅影響力，或者資源，我哋希望以後可以做多啲嘢，可以幫身邊唔同嘅人。」至於再登舞台會否有陰影：「因為我哋暫時都未真係踏番上舞台，我唔可以答實你一定，或者一定冇，但係我相信，經過今次之後，我哋每一位同埋所有相關嘅人士，都一定會更加關注安全問題，希望之後唔會再有咁樣嘅事情發生。」
而Ian被問到早前辭演電影，他則回應：「做咩作品都好，一定要準備好，特別係演戲，要100%投入揣摩角色，全程投入去拍攝。作出辭演呢個咁大決定嘅時候，係講緊八月嘅事，電影公司亦都好好，好多謝佢哋體諒， offer話等你心情調整好啲、沉澱完，睇吓十月會唔會再拍，但我當刻嘅諗法係，一嚟我唔係好想拖延大家嘅進度、要成個劇組百幾人等我一個；第二係當時嘅我，真係唔能夠完全肯定到我十月就會好啲，所以先會作出咁嘅決定。」
