18年後翻拍中年《浪漫滿屋》　張儷米7長腿唔夠贏

韓星Rain及宋慧喬2004年合演人氣韓劇《浪漫滿屋》，帶挈二人風靡全亞洲成天王天后，刷新韓國、泰國、菲律賓等亞洲地區當地嘅收視紀錄，更先後被菲律賓、越南、泰國等國家翻拍，估唔到事隔18年，依家更有內地版即將出爐，不過未播出就先有爭議！

近日啱啱開鏡嘅《浪》內地版將會沿用舊名，女主角由曾參加《乘風破浪》、今年38歲嘅張儷擔任，雖然張儷身高1米7，又係中央戲劇學院表演科班出身，不過一向行長腿性感路線嘅佢仙氣冷艷，比起宋慧喬佢外形就似乎唔夠甜美。而男主角則係現年41歲嘅美籍演員丹尼斯吳（Dennis Oh），擁Mix樣Chok爆嘅佢身高1米88，雙眼深邃有神又有佬味，對比當年已經係天王嘅Rain，佢就喺年齡上輸蝕。今次開鏡消息一出，網友就負評如潮，大批網友唔睇好男女主角，指二人年紀加埋成80歲，選角一啲都唔襯青春戀愛劇；同時又有網友力撐二人顏值十足，係依家Hit爆嘅「中年偶像」代表，分分鐘會跑出創新血路。

東網網站 : https://on.cc/東網Facebook專頁 : https://www.facebook.com/onccnews/