跑步可以為減肥，可以為健康，可以為減壓，但原來跑步可以為自己之餘，更大的意義原來是鼓勵身邊人。把運動的快樂與身邊人分享，看見他人因為運動而變得更好，這種快樂，相信比起為自己而跑來得更滿足。
徐逸樺 Charmian（小明），素人跑手，跑齡 8 年，已是兩孩之母。最初是半推半就下開始練跑但很快便愛上，甚至帶動身邊人「一齊跑」，以生命影響生命！更當上了 Nike Run Club 配速員，除了多了一份使命感，更學懂怎樣與人分享跑步的熱情，如何作鼓勵性的說話，然後帶動身邊人。
「我跑到，你都可以跑到！」
Charmian 並非精英跑手，與大家一樣都是個熱愛跑步的人，跑步經歷跟不少活動參加者一樣，非常「貼地」，所以她的鼓勵說話也很有說服力！「我經常講 『Everybody can run』，即係『我跑到，你都可以跑到』。有啲媽咪驚訝我生咗都照跑步，我話：『係呀，我生咗都跑到，你生咗都一樣跑到。』」
當了配速員之後，Charmian 對跑步的了解又深入了不少「以前剩係知道要跑快啲、跑多啲；而家做咗配速員，經驗多咗，就知道點樣可以跑耐啲、跑好啲，無咁易整親；同埋，最重要係點樣鼓勵到人一齊跑！」
今年渣馬 2021，NRC Pacer Team 組成歷來最龐大的女配速員團隊。Charmian 同另外 25 位女配速員，沿途帶領參加者，亦希望一起分享跑步的熱誠。到底她是怎樣成為配速員的呢？
「好有滿足感㗎！有啲無乜做開運動嘅同事都落嚟跟我哋行吓。」
Charmian 一向性格好動，一身健康膚色襯上專業跑裝，明顯是一個跑手模樣。然而，回想八年前，她當初開始跑步是泰拳訓練一部份，純粹為了增強體能 。「初時跟泰拳嘅師兄師姐跑，之後就鍾意咗跑步，七、八年前開始就全情投入，差唔多每日都會跑步。」
Charmian 身邊的同事也受她影響「有啲同事見到我 lunch time 跑，就跟埋一齊跑；後來每日中午都有十幾個同事一齊去跑馬地馬場跑。大家有快有慢，跑完之後一齊沖涼，再去買飯返公司食。」
跑步更令他們建立了長久的友誼「而家我離開咗間公司，會繼續跑嘅同事都變咗朋友，我哋仲會約出嚟跑步。」
因為一句 「Come Run with Us」 立志成為配速員
有次偶然在網上看見 Nike Run Club 招募配速員 ，上面的一句 「Come Run with Us」 令她立志成為配速員。於是 Charmian 便抱著一試無妨的心態報名參加。「每個月要跑 5 公里 或者 10 公里嘅 Time Trial。亦要學習同跑手溝通，帶領大家熱身。」 其後經過三個月訓練及考核後，Charmian 終於成為 NRC 配速員，從此開始不一樣的跑步體驗。
Charmian 第一次正式的配速活動，便是 2018 年的渣打香港馬拉松，當時有好多突發事件「最深刻係點樣鼓勵跑手，同時又要唔會阻礙其他有目標嘅跑手。而入到西隧真係好逼！連自己帶住嘅隊友都見唔到，到而家都好難忘！」
Charmian 與其他配速員也很努力準備今年渣馬的配速工作 ( Charmian 的 Instagram )
「一個人跑係屬於自己嘅 me time；一班人跑有講有笑，時間好易過。」
一群人跑與一個人跑，總會有些分別。認真練跑時，Charmian 多數選擇自己一個人練習，著重訓練技術；但後來參加活動認識了其他女跑友，便會相約出來一起練習。一群女生一起跑，卻是帶給她一種全新的感覺！
「一個人跑係屬於自己嘅 me time，畀自己一個人諗吓嘢，暫時放低公事、家事。但一班女仔一齊跑係好開心嘅一件事，傾下女仔嘢，有講有笑，時間係易過好多。」
「大住肚做 Pacer，感受到來自團隊嘅關愛」
Charmian 現在有一子一女，她在懷上他們的時候均有繼續跑步。「2016 年我陀住哥哥跑咗柏林馬拉松，嗰時我都仲未知自己有咗；後來 2018 年我又陀住妹妹跑咗渣打全馬，當時都有問過醫生意見。」現在她也不時跟一對子女笑言「你哋未出世就跑過全馬喇！」Charmian 不忘強調一次，每位孕婦的身體情況均有不同，要先徵詢醫生意見才跑步。
如果大家在路上看到有孕婦頂著肚子跑步，相信也會吸引到你們的視線。而 Charmian 不只一次試過跑步時給年長女途人攔下來，著她不要再跑，要好好安胎。
回到 NRC 的團隊內，情況又很不同。「我大住肚做 Pacer，感受到來自團隊嘅關愛；當我出席活動嗰時，啲參加者又好照顧我，怕我跑得太攰。」Charmian「陀住 BB 跑步」的故事引來不少媽媽跑手關注，她們也對此非常好奇，可是華人社會對於媽媽跑手的資訊不多，甚至不鼓勵孕婦運動。因此 Charmian 會大方分享自己的經歷，提醒她們跑步時的注意事項，與媽媽跑手們互相扶持，實踐 Charmian 一直強調的「Everybody can run」精神。
「唔好畀其他跑手影響，要清楚知道自己目標喺邊。」
渣馬大日子即將來臨，Charmian 亦會於大賽當日現身十公里 2 組為大家配速，目標時間是 1 小時 15 分，即是每公里 7:30 的配速。她特別提醒「今次十公里跑新嘅賽道，跑入西隧後又要馬上跑上天橋；對初次跑嘅女跑手都會難啲適應，我覺得對新手嚟講係困難嘅，所以開跑時要慢啲，唔好畀其他跑手影響，要清楚知道自己目標喺邊。」
今年渣馬 2021，NRC Pacer Team 組成歷來最龐大的女配速員團隊。Charmian 同另外 25 位女配速員，沿途帶領參加者，亦希望一起分享跑步的熱誠。 ( Charmian 的 Instagram )
文 / 攝影 : 艾頓
編輯：艾頓、K
美術：K
留言 0