陳志雲疑鄭中基聲明表達不準確　指助手仰慕老闆很常見

鄭中基(Ronald)早前突然在社交平台出聲明指：「由於發現何慶湘工作及道德操守有問題，本人與機動娛樂立即終止合作，有關工作交接問題會另作安排。」引起粉絲及網民關注，不過事件中人仍未公開回應，而昨晚機動娛樂再發聲明，鄭中基社交平台也有分享，當中提到何慶湘已於8月3日正式離職，鄭中基在完成兩個演唱會後將休息一段時間。而昨日陳志雲及李婉華就在網台開直播時評論事件。

陳志雲稱不認識鄭中基及其太太余思敏和經理人何慶湘，但就大爆有和鄭中基關係密切的人透露：「話今次佢只係寫嘅時候文字表達唔準確，唔係終止同機動電視嘅合作，係終止同何慶湘合作，間公司仍然都係佢嘅。鄭中基本身好多錢，都唔憂，佢唔係再科錢落去，呢個機動電視仍然會繼續，只係佢唔同何慶湘合作，佢冇理由終止同自己公司嘅合作。」
李婉華則提到余思敏在鄭中基出聲明前已在IG限時動態預告：「Good morning HK. Something big are coming……want to see？」再標註了鄭中基、何慶湘及機動電視台。陳志雲再說，其實員工或助手仰慕老闆、多了情感投射都是十分常見，之後再分享自己聽到：「鄭中基做幕前，佢搞呢個台，對營運唔係好大參與，佢抌咗錢出嚟亦都冇再注資，而家簽咗啲藝人，開支都大，聽聞坊間話何慶湘係好勤力，好賣力，周圍『𢯎』數，但係就有啲八卦嘢，佢做經理人淨係同Ronald接工作，太太嘅工作佢唔接，有啲拗撬出咗嚟，太太出咗啲Post，可能對佢兩個啲關係唔高興，後來攞晒啲數嚟睇，覺得啲數唔係好對，搞到而家咁樣。但係何慶湘嘅朋友相信佢唔係穿櫃桶底嘅人，鄭中基最後出呢個Post，話要中止工作關係，覺得佢做嘢有問題，有熟鄭中基嘅朋友就話唔係好似佢，佢唔會寫到咁撇脫，咁絕，咁勁，話人哋幫佢代筆都唔定。呢個真係唔知，但係有啲暗湧喺入面，而家應該係佢太太掌管返個營運。」