Wyman發火鬧爆Paco擅改楊千嬅〈Mr〉歌名 並非第一次：求X其改個歌名

作為創作人，自己作品被改當然不高興，如果被擅自改，更加火起。現身處英國的填詞人黃偉文(Wyman)，昨晚就在IG出文，鬧爆Paco黃柏高當年擅自改了他寫給楊千嬅的〈Mr〉歌名，提到「離題到爆又老套」、「只不過係Paco旗下好多好多首粒聲唔出自己求X其改個歌名到出咗街我先知嘅歌」、「呢啲咪叫唔尊重囉」，不少網民留言問原名是甚麼，不過Wyman暫時未有回應。

Wyman昨晚留言：「可想過你那弱點，就是我剛剛想要。 #而家個歌名叫Mr #離題到爆又老套 #只不過係Paco旗下好多好多首粒聲唔出自己求X其改個歌名到出咗街我先知嘅歌 #之一 #其實問吓我先都係一個電話啫又有幾難呀 #如果我唔係每一個字都執著要撚到最好先見人我就唔應該做填詞人啦 #唔好立亂改我啲嘢 #更何況係歌名 #呢啲咪叫唔尊重囉 #所以唔好郁作家嘅心血 #否則真係記你一世」亦有網民指一直也覺得不明白：「唔怪之得，其實一路都唔係好明呢首歌點解叫Mr。」

其實黃偉文爆被改詞改名都並非第一次，之前公開過1997年新加坡歌手許美靜〈傾城〉手稿呻被擅改歌詞，指當時初出道無奈接受。之後還有張學友、林憶蓮的〈日與夜〉歌詞，當時黃偉文留言更指出街版「九唔搭八」：「我不強求塗鴉者有足夠的文學修養知道自己的添足有多平凡，所以這我就先不計較了，但用『收起』對應『記憶』的騎呢、『終會』配『最好』的九唔搭八⋯⋯如果居然有人唔係先入為主或者聽慣聽熟有感情而真心覺得『唔係喎，而家個出街版好啲喎好似』，咁呢位朋友的文字品味也十分日與夜。」