請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

新聞

【圍困理大】警開咪嘲留守者要食生命麵包 網民發起「和你食包」:食包唔可恥,Popo 你食屎

Stand News 立場新聞

更新於 2019年11月22日05:43 • 發布於 2019年11月22日05:35

警方圍困紅磡理工大學留守者踏入第六日,繼在校園外圍播歌外,繼續出動奇招「勸降」。有傳媒昨晚發布片段,聽到有警察在校園外圍用咪廣播,嘲諷留守者只能食「冷冰冰嘅生命麵包」,自己放工後則可以上深圳食「海底撈」、飲啤酒,「(生命麵包)通常基層拾荒者老人家食,我覺得係好可憐嘅一回事」。

警察的「生命麵包」論在網絡引起哇然,有網民發起今午「和你 Lunch」快閃集會,一同食生命麵包以聲援理大留守者,更表示「食包唔可恥 Popo 你食屎」。

《眾新聞》昨晚發布片段,顯示有警員在理工大學外圍繼續廣播「勸降」,期間開咪的警員批評示威者「垃圾」,「我真係覺得你哋好垃圾,又要比人擋住,做又做唔掂、做又做唔好,又無恆心」,「我睇你哋唔起呀!唔係因為我同你政見唔同、立場唔同,係因為你哋做人冇原則、冇底線、冇承擔、冇責任感,同埋冇腦啊。」

該名警員又指,示威者「完全刷新我嘅人生觀、刷新我目光,我(以前)唔覺得香港有人咁蠢嘅」,「但經過依幾個月,我真係發現原來香港咁多人受過高等教育 … 比我智商、分析能力、或者邏輯能力,係更加低。」

警員叫示威者「懾高枕頭諗一諗」,「唔好淨係收埋你哋自己鍾意睇嗰啲嘢,接觸下出面其他人嘅諗法,擴闊下自己眼光、睇其他人嘅文章」,「你會發現,原來你係錯得好緊要」,「你哋真係喺度發緊夢架!我話你聽,呢個夢好快醒,你哋全部要承擔之前所犯錯誤所帶來嘅惡果」。

該警員又疑大打「心理戰」,嘲諷留守者在寒風中只能食「冰冰冷冷嘅生命麵包」,並言「Okay!你哋鍾意食,無所謂嘅。我哋陪你守三個月、守三個禮拜,都無問題」,「陣間我夠鐘收工,有第二班警察嚟接我,你食生命麵包,我就上深圳食海底撈!哇!諗起都正呀!又可以飲冰凍啤酒!」。該警員又指,生命麵包通常是基層、拾荒者老人家才要食,「我覺得係好可憐嘅一回事。」

今日中午,中環、太古、觀塘等繼續有上班族響應「和你 Lunch」午間快閃行動,有市民在中環交易廣場位置,放下各種口味的「生命麵包」。

守護言論與新聞自由。立場新聞,寸步不退。
每月贊助支持立場新聞

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0