除了MIRROR外，衛蘭亦將於7月（9-11日）舉行紅館演唱會，相隔4年再踏紅館舞台，Janice之前於社交平台以紙袋蒙頭扮華納高層宣佈開騷，內部認購已火速爆滿。
《Janice Be Still Live 2022》是Jancie入行以來第5個個人紅館演唱會，她親自參與很多關於演唱會製作，希望讓大家見到一個全新的衛蘭。「今次會開四面台，希望可以近啲，多啲同歌迷互動到啦，製作上面同揀歌等等，我都參與好多，不停開會研究，點樣可以做到最好。個演唱會名都係我構思，因為之前疫情，一個人坐係屋企，經常都有亂諗嘢，有過擔心同憂慮，世界會變成點呢？我又會變成點呢？然後就睇到呢句經文 : Be Still。希望藉此提醒自己及大家，世界被疫情和各種不穩定情況下所困擾，但必需保持心靈平靜，處變不驚，將心靜下來，細心聆聽自己的心意，好好照護自己的需要。」
踏入40歲，Janice自覺人生目標更清晰，坦言現在是為自己而活！她説：「女人40係一個好開始，我覺得好開心、好健康，同埋好放鬆，我仲覺得自己好似新人咁，因為音樂是無限探索的，我而家有跟老師學唱歌，因為我唱歌有啲壞習慣，喺咬字及運氣上未運用到最好，所以要有改進。」
Janice亦為增強體能展開地獄式訓練，她笑言以前減肥為別人而減，現在減肥為自己的健康！她每天舉啞鈴、跑步機不停鍛練：「原來自己舉啞鈴可以去到好盡，越舉越重，都幾劇烈吓，雖然辛苦但是對自己練氣很有用。」
Janice透露演唱會其中一部分會邀請一班好朋友上台表演，將會是感動又熱鬧的環節。今次音樂總監找來一直合作無間的年輕音樂人蘇道哲，他組織業界頂尖的樂手和管弦樂隊。在揀歌方面會新舊合一，「最希望可以用我聲音去治療到大家心靈。」
