前港姐蔡嘉欣（Kayan）日前因為一個「Barbie」帖文而被網民叫同框的何依婷（Regina）、陳詩欣（Eunice）、鍾晴疏遠拜金的她，她在留言欄寫道：「你咩事呀？不嬲都係我自己拜金㗎啦！你點解覺得我地（哋）一齊拍個片就認定佢地都拜金呀！離唔離開TVB又關我事？我帶壞人哋呀？吓？」
蔡嘉欣今日（8月14日）再於IG上貼長文，力撐自己拜金有理。她直言從來都承認自己拜金，並表示自己從18歲開始創業後，就知道所有都離不開一個錢字。她表示「將生活標準&質素全部量化，就係錢。」、「想要更好的東西，只能搵多d錢」、「我係拜金，但我拜金得起」……
「世人好似普遍覺得「拜金」話題好JUICY，今天我也來說一說。關於拜金一說！我從來都承認我拜金！我由18歲創業開始，發現樣樣都係錢。租間鋪、地區、大小、甚至連高層定低層…樣樣都係錢。將生活標準&質素全部量化，就係錢，所以我好早，由18歲開始已深知，想要更好的東西，只能搵多d錢，所以過去11年，我一直堅持自己的事業。一來我熱愛工作，如果我停下來，我無所事事，我覺得好悶，不有趣！二來，做了很多年，我有責任要繼續搵錢，因為我要養員工，我都希望佢地生活質素能一起提升，所以對我來說，拜金好重要。」
「因為拜金，我才有動力繼續努力工作，當然生活質素可取捨，注重生活質素的金牛座，喜歡吃fine dining，但我同時都覺得一碗譚仔超美味。我同樣會因為食左一個10蚊的菠蘿油而無比快樂，我鐘意買野（嘢）扮靚靚、我想去旅行可以住靚靚酒店，而擁有這些東西的代價是我必需要堅持和努力我的事業。」
「好多只睇新聞而認識我的普羅大眾，只見我吃喝玩樂，而不知我實質上都跟大家一樣要返工，唔緊要，但我想勇敢、真實地同大家說，係呀我係拜金，但我拜金得起，拜金的我以後會繼續為了提升我生活質素而努力工作！新時代女性們，誰和我一樣拜金？ 勇敢說出來！」蔡嘉欣又再留言寫道：「另外，拜金咪拜金囉！工作完有少少錢 #可以貢獻香港零售業經濟 大家開心，何樂而不為？」