蕭正楠1人分飾3角　挑戰演技新高度

台慶劇《巾幗梟雄之懸崖》明晚大結局。劇中蕭正楠一人分飾三角，再度挑戰演技新高度，第三次與蕭正楠合作的監製嘟嘟坦言感受到蕭正楠的躍進及蛻變：「其實我覺得佢做得好好吖，佢三個角色都演得好清楚、到位，所以我剪接時都剪番之前佢唔同角色嘅相關場口同對白落去做對比。」又言：「今次佢好實在話畀我知佢係一個演員，之前都感覺佢係介乎歌手與演員之間。

今次三個角色表面好大反差，但大家私下討論嘅共識係唔好將角色演得太極端化，要細緻啲。跟住阿蕭佢去到現場嘅表現，見到佢消化得好好，叫佢演龍四海佢就龍四海，演林茂財就林茂財，演邊個就似邊個，好似上咗身咁揮灑自如。佢嘅投入同專注度，令我覺得佢係真正嘅演員。」讚不絕口。

東網網站 : https://on.cc/東網Facebook專頁 : https://www.facebook.com/onccnews/