除咗業績，好耐都無睇過通告，如果唔係「仆你個街，亞視嚟既」（非貶損公司，取自張家輝電影經典對白），我都真係無興趣望下。亞視（707），係吖，係上市公司嚟㗎。剛剛星期五宣佈供股兼配股計劃，供股部份2供1，供股價0.1元發行6.55億股；配股部份股份同供股股份差唔多，配股增發7.12億股，供股同配股預計分別集資6,342萬元同埋6,899萬元。
不過大家可以唔使睇配股嗰部份，因為通告寫明，未搵到承配人，而承配人亦唔會成為亞視嚟既單一大股東，即係配股接貨純粹係貪佢較收市價有46.8%折讓，但睇完盤數，可能連供股都供唔足，唔好講配股搵到人幫手夾錢。
條數有幾特別？佢未出中期業績，所以通告都只係用截至12月底止的全年業績作準，截至12月底止，亞視既有總資產1.269億元人民幣，但單係1年內要還清的流動負債已經有8.148億元人民幣，至於非流動負債嗰290萬元人民幣就當睇唔到豪俾佢，負債比率2.8倍。
當大家以為到8月時8億幾負債應該做好安排或者重組，對唔住，無。通告寫明截至通告出街一刻，應繳的流動負債仲有8.02億元人民幣。如果供股成功的話，公司集資淨額有6,342萬元，公司預計用5,080萬元去還債，喂，欠債8億還5,000萬，夠唔夠俾息？
以上一切的前置是公司會有人供股，大股東劉敏斌會唔會供？我唔知，我淨係知劉敏斌係8月2日被公司出通告罷免主席一職及暫停執行董事職務，原因有好多，包括擅自委任親信等等，但其中一項係挪用公司網上內容：
「由劉先生管理的本公司非全資附屬公司在未經董事會授權或批准的情況下，挪用屬於本公司的網上內容，為其自身使用並從中獲利。經董事會查詢後，劉先生回應，指有關網上內容已由附屬公司正式授權使用，並且是為了本公司的利益而使用。」
一間資不抵債、內部鬥爭、重組又重組、睇唔到經營前景（去年全年營業額1.05億元人民幣，銷售成本及融資成本分別達1.278億元及7,084萬元，全年股東應佔虧損1.32億元）的公司，會有人供股。
但無論如何，亞視，長命過好多人。
李鴻彥
https://www.facebook.com/LeeHungYinJoe
註：專欄作家言論不代表本網立場
密切留意BossMind動向！立即CLS
留言 0