【娛樂評論】《幫緊你應援團！》　好睇唔止因為心地好

上星期ViuTV仲播緊亂咁嚟，搞事搞氣氛多過搞節目的《七救星》，今個星期氣氛一轉來套《幫緊你應援團！》。雖然兩套節目調子不同，但其實話到尾都係幫人節目，七師傅看似無句真，但最後都是目標達成仲不時有感動位。

來到《幫緊你應援團！》，主持人接到救助者要求，展開幫助計劃，頭一集講MIRROR粉絲媽媽，獨力湊大一對仔女然後見到MIRROR真人，另一集講一位男士為向女朋友求婚，閉門學跳舞。內容普普通通無驚喜，沒七師傅的詼諧，亦沒有難忘的感動位，正想放棄之際，去到第三集講一位失明人士學玩划艇，在看不見終點的旅程，卻逐步接近終點，勵志味開始滲出。

到第四集，玻璃骨少女斌琳與好友Cami一段超越友誼，比親人更似親人的友情，因為患該症狀的病人，30歲將會是個大限，而28歲的斌琳雖然性格樂觀，但都開始有心事想逐一達成，作為朋友的Cami便出手相助，讓她可以跟偶像Ian短聚半天。

有Ian出現當然是亮點，但都是錦上添花，重點是斌琳與Cami的超友誼。常說久病無孝子，莫說朋友，就算是親人，要長期照顧一個病人，縱有愛心和耐性都會有一刻洩氣耗盡，更何況是朋友。雖然二人並沒有交代這種無私的關係源起於甚麼？只是這種無比的友情，令人看得動容。難怪斌琳都會說自己是前世做了甚麼好事，而這句話由斌琳說更見其樂觀指數有多巨大。

到第五集，講岑珈其要給媽媽一個驚喜，環保至上的岑媽媽，沿用的按摩椅已去到甩皮甩骨程度都不捨更換，於是要安排一個方法送上這份大禮。任務初看相當普通，期間還要附上按摩椅植入式廣告，似一次商演多過節目，相當沒趣。不過去到送禮一刻，這個驚喜正正打動岑媽媽的情緒，當場喜極而泣，做仔的亦坦言多年來都不太懂孝順，直頭自己做爸爸才另有體會。兩母子的即時反應，令畫面充滿愛，完全捕捉到二人最真一面。

ViuTV高層魯庭暉日前出Post嘗試解說點解這個節目獲觀眾支持，他總結因為製作組「呢班人，個底，應該好心地。」不過這都是製作的動力，能夠展現各人最真一面，更是真人Show追求的最重要一環。

撰文︰余建

Facebook專頁︰https://www.facebook.com/Stupid.View