【Talk心事】十年「兄弟」結婚拒俾人情 反斥新郎無封利是

結婚是人生大事，每個人都希望有個完美婚禮，但華麗場面背後，需有不少人協助才能成事，包括兄弟姊妹。一名男子為相識10年的朋友擔任婚禮的「兄弟」，但他以「做好多嘢」為由拒俾人情，更反斥新郎不封利是，指「原來真面目係咁自私貪錢，同佢冇嘢再好講」，隨即引起網民討論。

該名「兄弟」在討論區發文，指相識10年的朋友結婚，並為他擔任「兄弟」，但他以「做好多嘢」為理由拒俾人情，「諗住幫佢做咁多嘢唔洗俾人情啦，點知佢話做兄弟都要收，仲唔封返利是俾我，話今場婚禮出咗好多意外同埋搞得太大，Over哂Budget(超出預算)，叫我體諒佢」，他因此事感到心淡，更揚言無兄弟做，「同佢做咗10年朋友，讀書去到做嘢，哈，原來真面目係咁自私貪錢，同佢冇野再好講」。

不少網民認為，相識10年兄弟不應該計較人情多少，理應替他開心，「連自己幾十年兄弟結婚都想要返封利是，真係兄弟」、「佩服你嘅面皮！十年兄弟，人情都唔俾，講出嚟俾人笑啦！」、「似係你諗縮數喎，十幾年兄弟結婚，幾千蚊人情都比唔出，咁唔值得高興？」

亦有網民認為，不少人辦婚宴為賺錢，不支持收人情，「邊個話做兄弟姐妹就一定要做人情，通常做係單純為咗情義，唔比係正常，反而主家要封番利是多謝人地幫你」、「而家啲人結婚，好似預左人地幫佢地埋單，有時重諗到擺酒要賺錢咁，根本而家變晒質」。