【李八方online】民建聯派雨傘拐杖 街坊邊派邊叫投陳凱欣？

外號陳健康嘅立法會九西候選人陳凱欣，早兩日先被《蘋果》讀者踢爆，以民建聯的英文縮寫「DAB」名義發出拉票電郵，佢呢頭先解釋係「技術問題」，嗰頭又有人質疑民建聯喺地區派遮幫「陳健康」拉票。

是咁的，社福界選委曾健超收到街坊報料，話民建聯九龍城區議員邵天虹喺馬頭圍邨搞「贈送愛心拐杖傘計劃」，計劃由「馬頭圍真善美關懷協會」主辦、並且由「九龍城區居民聯會」贊助，禮物係遮一把，唔係黃色，而係紅色。

雨傘拐扙嘅質素如何，八方無從得知，但重點係遮上印有居民聯會個名之外，仲煞有介事印住「健康常伴你」，答案呼之欲出。曾健超仲喺社交網站留言話，「一邊搞活動、一邊派單張宣傳叫人投票支持，仲一邊派禮物」，真係「賄選常伴你」。

八方問過曾健超，佢話據街坊所講，當時民建聯嘅人仲有呼籲長者們投畀5號陳凱欣添。拉票、派禮並肩同行，政府會唔會做嘢先？

陳凱欣競選團隊就回應話，並無安排任何相關活動。邵天虹回應本報查詢時指，他們只是派雨傘拐杖，並沒有叫人票投陳凱欣。

街坊話有，議員話冇，誰是誰非，呢場羅生門，各位似乎要自行判斷喇。

立會補選新聞，《蘋果》一網睇晒
http://bit.ly/appledaily1125