「做阿Jer呢堆歌係好飽，每一次都好滿足！例如上次做《狂人日記》玩到咁癲，我就諗：『今次應該點做好？』但原來當一班傻佬抱住同一信念，啲嘢自自然然就會生到，呢樣我覺得係最難能可貴。」
多年來炮製過無數樂壇經典好歌，王雙駿（Carl）仍然抱著一個信念——要夠好玩。從《水刑物語》到《砂之器》，利用編曲說故事，細聽下每首歌的聲音細節也是相互連繫，這是他給自己設定的一個遊戲規則。
柳應廷（Jer）的「重生」系列三部曲，不論在概念、歌詞、編曲及MV層面，也被樂迷稱之為上乘的藝術作品，而在王雙駿的眼中，創作過程好比充滿驚喜的實驗。談到 《狂人日記》瘋狂的編曲，他形容最過癮的地方，就是有做電影配樂的感覺。拿著歌詞，幻想那部分是甚麼的畫面，配怎樣的音樂才好。
「狂人其中一個特點，你永遠唔知佢開邊瓣，有時唔出聲，有時會發癲，所以我同阿Jer、吳林峰（作曲）、小克（填詞）就諗，不如成首歌係咁變。所以你一時聽到鋼琴獨奏，一時又有澎湃嘅鼓、電子音樂、管弦樂⋯⋯同埋bridge位我專登編到好似另一首歌。有一日我同小克、阿Jer傾傾吓講起黎曉陽，諗起佢原來識『喉唱』（蒙古特有演唱技巧）同吹Didgeridoo（澳洲土著的吹奏樂器），後來我哋就搵埋佢錄音，一路錄一路試，再將阿Jer把聲擺埋一齊，出到嚟嘅效果好特別，感覺就好似狂人發完癲，然後去咗自我覺悟嘅境界。」
完成《狂人日記》後，王雙駿表示自己心中已經有畫面，第二首將會是一首浪漫的作品，而歌詞卻是非常有深度。
《砂之器》中個人認為最難忘的一段音樂，是Music Break那盪氣迴腸的管弦樂，是王雙駿改編自電影 《齊瓦哥醫生》主題曲《Lara’s Theme》的一段旋律。在這段動人音樂之前，是一段由人稱啤老師的歌唱老師馮夏賢所唱的搖籃曲，聲音聽起來很遠，回音很大，就像媽媽對著肚內寶寶哼歌，寶寶隔著羊水聽到的聲音。他對這首歌的感覺特別深刻，有幾次錄音幾乎感動得落淚。
「因為我自己都係爸爸，好清楚媽媽要生一個小朋友，到底要犧牲幾多。我腦裏一直有個幸福畫面，媽媽哼著搖籃曲，摸住肚幻想，到底BB係點嘅樣呢？有趣嘅係，BB會俾反應，真係會聽到。所以當第一次chorus完咗，我擺咗一段鋼琴彈嘅搖籃曲，到第二次（搖籃曲）出現，就係Bridge之後，我搵咗一把女聲嚟唱。」王雙駿說，關於女聲人選最初沒甚頭緒，湊巧地那段時間他和啤老師在談其他事情，靈機一觸，他便想起啤老師是個適合人選。雖然她並不是媽媽，但就教過很多學生，同樣亦是一位演員，於是乎膽粗粗邀請她幫手。頭幾次錄音，他依然未有感覺，直至啤老師見到一樣東西。「我錄音室擺咗隻啤啤熊公仔，佢見到就即刻問我：『我可唔可以借嚟？』然後佢就攬住當係一個BB，跟住一唱，我即刻毛管棟，就係要呢種感覺。」
撰寫《砂之器》，王雙駿給自己設計了一系列遊戲規則：（一）要求《砂之器》第一粒音接住《狂人日記》最後粒音，聽起來就是（狂）風起了。（二）《砂》跟《狂》的曲調同為 C sharp minor，直至chorus才稍轉至C sharp major。（三）「風起了」後一句響起風鈴聲，呼應着《風靈物語》。（四）承接《狂》，管弦樂依然扮演重要角色。「今次呢首歌由我自己寫返，係因為既然自己set咗咁多規則，如果交俾人哋寫又未必知你想點，同埋對人哋都好唔公平。」
訪問中，王雙駿不時強調，揀選甚麼樂器、用聲都是有根有據，例如第一同第二個verse，聽起來已經有明顯分別，後者的mood and tone較為黑暗。「第二段verse嘅第一粒音，你會聽到一下重嘅Bass drum，我特登將個Low end（低頻）較重少少，再加少少Sub low，想營造嘅氣氛係，BB隔著媽媽肚聽到外面（傳嚟）嘅聲音，就係呢種聽落好遠又矇矇哋嘅感覺。 」
《砂之器》，代表著王雙駿第五次與Jer合作。經歷一年幾的磨合，見證著Jer起初錄 《水刑物語》時極無信心，到後來慢慢進入狀態，發掘到他更多的音樂潛能，Carl打趣說：「我同佢講：『你條命係屬於辛苦命㗎喇！作品只會一首比一首難唱。』難度不在於要幾高音，而係情緒投入度要好高先得。但佢份人好鍾意思考，好有諗法，俾份歌詞佢睇，好快已經有曬畫面。」
至於第六首作品，亦即是重生三部曲的最終章，王雙駿說其實Demo一早已經寫好，務請大家拭目以待！
收看更多音樂資訊，請 Follow：
Instagram
https://www.instagram.com/28music.journal/