台灣藝人歐陽娜娜憑住演奏嘅琴技,再配埋甜美嘅樣子備受注目,跟手食住個勢殺入娛樂圈,喺影、視、綜藝節目都見到佢嘅身影,人氣急升即成為唔少品牌嘅寵兒,呢日19歲嘅佢就影咗輯內衣廣告,正常情況下女星影呢啲廣告都會好受歡迎,但係今次竟然換嚟係負評,仲有唔少網民寸佢話:「你啲錢都好易賺!」
點解網民會咁講呢?事緣娜娜呢輯內衣廣告,有別其他女星着住性感款式盡展天賦本錢,當中大部分都係運動型款式,外面仲要加多件外套遮掩,保守程度實屬少見,唔講真係唔知佢Sell緊內衣,一眼望埋去以為係賣緊外套廣告!網民睇完啲相就直接開火,話佢唔想露肉扮純情就咪接內衣廣告:「妹妹你的錢也太好賺了吧?」
不過睇番品牌介紹,其實娜娜呢次內衣廣告主打自由舒適,追求嘅係女性喺辦公、學習、運動或者瞓覺時,着起上嚟都可以舒服自在,而非單純追求性感。
東網網站 : https://on.cc/
東網Facebook專頁 : https://www.facebook.com/onccnews/