無綫小花陳嘉慧（Erica）去年10月與富貴男友Calvin閃婚後，未夠兩個月就公布懷孕喜訊。日前，女兒已順利出世，重6磅多。陳嘉慧今日（3月21日）更公開幫女兒掃風片段，晒出BB肥嘟嘟面豬的可愛萌樣。
27歲的陳嘉慧於周一（3月18日）貼出BB的小手腳仔報喜，今日再分享當新手媽媽的片段，餵完奶幫女女掃風，片中見到BB食飽飽的滿足滿，又打呵欠，十分可愛。陳嘉慧寫道：「Hello BB，終於等到你出世啦」。
她又在帖文中，感謝醫院的醫生姑娘照顧，透露自己差點要開刀：「原本可能會食全餐直到可以順產，將冇可能變有可能，多謝你哋同我一齊堅持努力，每一日都俾咗好多鼓勵我。」
她又貼出與老公的合照，大讚老公在其待產其間的陪伴：「當然唔少得我嘅xiabb老公啦，陪足我10日醫院，日日陪我行樓梯，晚晚幫我按摩。 love u #係要撒下狗糧嘅雖然個過程係痛苦，但係結果係好～甜蜜」。
