香港飲食業近年經常被批評價錢貴、態度差，十分「趕客」，最近有女網民在Facebook群組「香港茶餐廳及美食關注組」分享在茶餐廳HK$22買礦泉水，還被侍應鬧，恍如「乞食咁」，批評茶餐廳「垃圾癲」，食到一肚氣。網民對茶餐廳「天價」礦泉水表示震驚，直言「搶錢」。
女事主在茶餐廳用膳時因要食藥惟有捱貴水，但最不忿還是侍應態度差，該帖文開頭已經大罵：「呢間野真係垃圾癲！ 」坦言價錢貴已經不是問題，但侍應有如當她「乞食咁」的態度才最令人氣憤，「 我都未講完要咩即走， 跟住我叫佢俾支價格22蚊嘅水（我已經唔係要免費水）我， 佢好大聲咁鬧我，好似我煩住佢咁，痴線㗎。」而且食物質素也差，貼錢買難受。
有網民留言回應表示認得該油麻地茶餐廳，並稱茶餐廳在區內「出名」難食、態度差、收費貴，但最令網民震驚的是500毫升礦泉水竟索價HK$22，「阿姐，你上去叫支22蚊嘅水，仲要行咁高樓梯，我都以為你痴線嘅。」網民提醒：「隔籬街$3。」「七仔都冇咁貴。」
有網民曲線為侍應解釋：「冇啦啦走入去幫襯，增加咗人哋侍應嘅工作量，要反省。」女事主也表示後悔當時未有立即離開，獲人留言安慰：「唉！攞個經驗啦！下次醒目啲啦！」
圖片來源：FB@香港茶餐廳及美食關注組、《行運一條龍》劇照
【LINE你睇】每日精選網絡熱話，源源送上新鮮事，LINE你睇唔驚冇話題。
