龔嘉欣長文自爆身體出事　生日願望：身體健康

藝人龔嘉欣喺《企業強人》中飾「方芳」一角，憑犀利喊功被網民封為「淚之女王」嘅佢，演技備受肯定嘅同時，亦係今年台慶視后嘅熱門人選之一。而不知不覺入行16年嘅佢，日前亦喺社交網晒出多張唯美嘅慶生照，只見着上純白露肩上衣嘅佢，盡騷香肩鎖骨之餘，典雅氣質更係相當搶Fo，同時龔嘉欣大方分享生日願望道：「我嘅生日願望就係，希望我身邊嘅每一位都身體健康（包括睇緊嘅你）！」並透露自己近期身體檢查時發現身體有啲毛病，但經過多位醫生嘅盡力幫忙，令佢情況得到改善，雖然龔嘉欣未有透露詳細病情，但就安慰大家道：「雖然仲未返到去最佳狀態，但係我會努力養好自己身體，大家唔使擔心！」

此外，強調自己係「典型工作狂」性格嘅龔嘉欣，表示往後都會更專注努力演藝工作之餘，亦為可以繼續做自己鍾意嘅事而感到開心、充實，最後亦為自己訂下新一年新目標：「又大一歲啦，希望我哋繼續互相陪伴，亦都希望自己可以參與更多社會公益活動，呢個都係我新一年嘅目標！」

東網網站 : https://on.cc/東網Facebook專頁 : https://www.facebook.com/onccnews/