叱咤2024｜張敬軒發長文回應借獎予陳卓賢　曾送馮允謙名錶約定紅館見

《2024年度叱咤樂壇流行榜頒獎典禮》昨晚（1日）舉行後餘波未了，3個單位包括Ian陳卓賢、同為英皇的生力軍男歌手金獎Arvin曾傲棐及生力軍組合金獎VIVA，都有在台上感謝張敬軒，亦有人不忿Ian力壓馮允謙連奪男歌手金獎、唱作人金獎及至尊唱片獎。頒獎禮後，今日張敬軒難得有時間，在Threads發出多個帖文，回應借獎予陳卓賢及幫忙其他歌手的原因，亦回應多個網民的留言。’

張敬軒今日在Threads寫長文表示希望發言：「好多嘢大家攞嚟講下笑下我都冇乜所謂，反正我份工都包埋嘅，不過千祈唔好拱我去咩嘢位高權重、社會權威嗰邊，無論喺我自己嘅公司入面、定係喺我自己依家呢份工、所身處於嘅工業當中嘅位置我都只係想好好做一個Servant（僕人），去serve好自己身處個行業，結多幾份善緣。」

張敬軒續道：「我當年兩手空空嚟香港，我眼前擁有嘅成績好大部分都係呢個地方、呢一度嘅人畀我嘅，到咗我擁有咗咯，我就盡自己能力畀返出嚟，係對呢度嘅行業，又甚或呢一度嘅人對過我好、愛戴我嘅情義，冇乜嘢值得一提，一切都係應份嘅。」

Ian昨晚得到男歌手金獎後，透露張敬軒去年攞男歌手金獎後將獎座送給他。Ian說：「佢就同我講『你擺喺屋企，我相信有一年你可以攞到男歌手金獎，攞到就俾返呢個獎俾我。』」張敬軒特意寫文回應借獎予陳卓賢的始末：「關於Ian單嘢其實係咁嘅：兩年前我20週年紅館演唱會搵咗阿姜、陳仔、Jer嚟為我擔任表演嘉賓。嗰陣時嘅佢，不苛言笑，又唔係好同人講嘢，畀我一種處於焦慮同埋憂鬱嘅感覺，佢嚟彩排嘅時候嘅狀態，再加上演唱會之後佢搵我幫佢監製一隻歌，我哋慢慢熟絡咗，我喺佢身上睇到咗05至07年嗰個階段嘅我，經常散發出一種對前路茫然嘅感覺。」

張敬軒表示：「我覺得佢哋（MIRROR）12個仔個個都叻，各有各叻，但係畢竟每個人嘅際遇都唔同，要面對同解決自己原生家庭所帶來嘅困難亦都唔同，嗰段時間會經常見面嘅就係得Ian，我覺得做我哋呢行成名要趁早，睇見佢日日咁樣吽吽兜兜，係唔忍心佢浪費自己嘅青春同埋時間。」於是他決定教Ian如何重新打開自己及調整個人能量，所以就有借個男歌手金獎給他的想法。

張敬軒又透露Ian真的漏夜把獎座還給他，亦趁機指出Ian在台上的表現非常差。他說︰「我哋行內人知道叱咤台個音響咁多年以嚟都係一個挑戰（關於點解係挑戰，有興趣嘅喺度留言，我可以專門開個post講） 但係我同阿陳講，我跟過甄妮、朱咪咪、陳潔靈、肥媽呢啲前輩搵食，無論個音響幾有問題，一上台揸住支咪，紮實嘅唱功就硬硬正正咁樣喺嗰度！觀眾係唔需要去bear我哋喺硬件上所遇到嘅問題，觀眾淨係嚟享受㗎咋。」

張敬軒續道：「我有同佢（Ian）講：無論因為乜嘢原因，自己當晚嘅表現唔好嘅話，就好好記住呢一種唔開心嘅情緒，唔好放過自己，將呢種情緒變成你去訓練去進修嘅動力！點解我有時會好認真咁樣上網睇人點樣鬧自己呢？因為令你進步嘅方法嘅答案就喺入面！當我哋面對批評嘅時候我哋要抱住 MAYBE YOU ARE RIGHT 嘅心態！佢諗一諗，然之後答我：我一定會再練多啲, 一定會越來越好！我有同佢講、我亦都有喺現場同柏宇講，阿姜嘅唱功進步咗好多！」

至於有網民為Jay Fung馮允謙失落金獎不值，「麻煩張生可以就俾埋Jay Fung 除咗你之外都好想佢拎一次男金」，張敬軒回覆留言道：「我人生第一隻IWC就送咗畀佢，叫佢帶住，因為係我第一個紅館演唱會出咗糧買嘅，之後佢做到咗」。

2022年馮允謙在九展Star Hall舉行《Have a JAY Time 2022 演唱會》，擔任嘉賓的張敬軒在台上將IWC名貴腕錶送給Jay Fung，他指是2008年完成第一場紅館騷後，送給自己的第一份名貴禮物，張敬軒說：「因為我都收埋好耐，喺夾萬將呢件禮物攞返出嚟。喺當年，呢件禮物係我人生當中，第一件送畀自己最珍貴嘅禮物，因為佢對我好有意義。」

當時張敬軒又跟馮允謙說：「你唔好介意係二手，我知道佢係斷咗嘅款嚟。呢隻錶陪伴我開咗好多場演唱會，我綵排都會戴住佢，因為喺好長一段時間，佢都係我人生最貴嘅一隻手錶。」張敬軒勉勵馮允謙把握機會，約定對方紅館見，令後者大為感動，當時更親手將腕錶戴到後輩手上，並說：「我幫你上咗鏈，已經較好個時間，係今日嘅日子嚟嘅。」