9秒片曝光︱瘋傳有私生子　小S老公蒲吧攬女斷正

台灣女星徐熙娣（小S）同老公許雅鈞成日公開放閃，不過同時亦多次被傳出小S被老公家暴、許雅鈞疑多次偷食等，但二人都堅持否認所有指控同質疑。點知尋晚（6日），曾參與演出中劇《三十而已》嘅藝人「小胡靜」忽然爆料，上載一段許雅鈞蒲吧攬女嘅9秒短片，並配文：「她老公真的好愛玩啊」引發爭議。

汪小菲早前砲轟小S時，就聲稱稱許雅鈞「在樓下會館找姑娘」，又稱對方喺上海有好幾個女朋友等，但S媽當時就力撐許雅鈞，表示雙方相處多年，好清楚佢為人。點知今次小胡靜段片，就清楚見到許雅鈞現身夜場，身邊仲有一位着貼身裙嘅女士用手攬住佢，之後許雅鈞亦有望向鏡頭，明顯知道有人拍緊片，不過佢就未有表現抗拒。片段曝光後，即令網友再次聯想早前種種負面傳聞，並留言指等睇是非食花生。

同時，網上瘋傳許雅鈞於2019年就已經喺上海育有一個私生子，有網友晒出多張女性自拍及抱住BB嘅合照，有網友聲稱許雅鈞對「小三母子」豪擲金錢，之後更有人指搵到「私生子」媽咪嘅社交網，不過該社交網被曝光後就已被清空，而許雅鈞及小S方面亦未有任何回應，因此未能證明傳聞真偽。

東網網站 : https://on.cc/東網Facebook專頁 : https://www.facebook.com/onccnews/