炎明熹（Gigi）將於明晚（年初五）播出的《愛‧回家》驚喜現身，在劇中飾演自己，引發連串事件。對於首度「登陸」《愛‧回家》，Gigi坦言大感興奮，並直認由小學時開始已是捧場客：「我有追開《愛‧回家》，時間許可，我會準時8點鐘喺電視面前觀看，呢個處境劇我係由細睇到大。」
Gigi表示，能與劇中角色真正合作，感覺既榮幸又夢幻：「真係不可思議，冇諗過以前甚至依家睇緊嘅劇，會有機會遇到佢哋（劇中角色），雖然有時喺TVB會遇到大家，但唔會真係話傾偈嗰種。」
Gigi續指劇中最尊敬角色是丹爺，並爭取機會與對方合照：「我知佢做咗好耐《愛‧回家》。我好開心可以加入呢個大家庭，因為我見到佢哋好似屋企人咁相處，佢哋會互相叫對方阿爸、家姐或者阿妹，然後佢哋亦都好照顧我。」
另外，Gigi還大讚劇中道具相當像真：「我覺得有個好得意嘅地方，我一直以為新威龍廣場係一個真嘅廣場，然後Key個名落去，後來我知道原來係一個廠景，係特登搭出嚟，我覺得好神奇，同埋入面啲產品同店名都好得意。」
Gigi更透露希望日後能多點拍劇：「我一直好想拍劇，我覺得拍劇好有趣，我好鍾意同工作人員相處，拍劇時真係會經常對到大家，而佢哋真係非常之好，好似屋企人咁，所以我希望儲多啲經驗同能力後再拍劇。」