香港整體食物供應超過90%為進口食品，想食到本地生產嘅食物，多時都要花心機去尋找。之不過，選委會界別嘅議員洪雯似乎有另一種睇法，甚至話香港要有糧食安全意識。唔知有咩啟發咗佢呢？
原來日前洪雯驅車走入流浮山，仲參觀咗一個新式溫室同漁場，其中負責營運嘅都喺一班年輕人。洪雯喺社交平台分享，話佔地15,000呎嘅農場分為2大部分，其中溫室種植水耕沙律菜，月產4噸；其餘地方，就用嚟養殖淡水龍蝦等水產，月產數百斤。但佢印象最深嘅都係喺水產養殖方面。佢話場內挑選嘅品種，都係按照港人口味而定，團隊亦會好好控制水質，一旦龍蝦出現咗問題，團隊會將嗰啲龍蝦帶到農場實驗室立刻研究。
雖然年輕人都好有心，但洪雯就比較感慨，話政府提供嘅貸款同基金唔夠，難以支撐企業可持續成長，擴張速度唔夠快，亦會令投資者卻步。所以佢建議政府發展多層式嘅室內種植養殖，精簡農地高空發展限制，令漁農業唔會變成夕陽工業喎！
東網網站 : https://on.cc/東網Facebook專頁 : https://www.facebook.com/onccnews/
