勝利傳尖東開夜店半山置業來港定居　網友爆遭無禮對待

前韓國天團BIGBANG成員勝利2019年爆出性招待、強姦等事件，其投資嘅夜店Burning Sun亦爆出暴力、販毒、性侵及賄賂警察等醜聞，其後勝利被判囚1年6個月，去年2月刑滿出獄。有英國媒體近日公開紀錄片，還原當年牽扯到韓星鄭俊英、勝利及崔鍾勛等連串醜聞嘅夜店事件始末，更公開勝利粗暴拉扯女生畫面，令事件再次受極大關注。不過近日有消息指，已敗走韓國家鄉嘅勝利有意移居香港，準備在港創業再出發，同時更有網友大爆遭對方無禮對待！

近日網上傳出勝利疑似來港定居，網民爆料指勝利有意喺尖沙咀東部搞生意，加上佢現身香港夜場，估計勝利較有機會涉足酒吧蒲點生意，又傳勝利喺半山買豪宅，傳到似層層咁。

同時有網民指上月喺音樂節見到勝利，爆料指當時見到勝利同酒商老闆應酬，又稱「依然有好多女當佢神咁拜」，並指自己同女同事遭對方呼喝：「同你喺紀錄片睇嗰啲語氣有得揮。」最後更勸喻各位女士：「自己睇路呀！」另外，性感女神貝依霖（Chantale Belle）亦晒出同勝利嘅合照，證實勝利的確曾現身香港。

東網網站 : https://on.cc/東網Facebook專頁 : https://www.facebook.com/onccnews/