請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

新聞

政Whats噏:指南區居民不滿巴士加價 張國鈞遭區議員反擊

on.cc 東網

更新於 2021年04月30日11:46 • 發布於 2021年04月30日11:46 • on.cc 東網
張國鈞將南區巴士加價同削減班次,歸咎於當區區議會冇做好監察嘅責任,言論隨即惹來相關區議會嘅反彈。
張國鈞將南區巴士加價同削減班次,歸咎於當區區議會冇做好監察嘅責任,言論隨即惹來相關區議會嘅反彈。

有政黨早前公布問卷調查結果,顯示南區居民對區內巴士服務相當不滿。身兼行政會議成員嘅議員張國鈞(Horace)話巴士公司加價同削減班次係忽略咗當區居民嘅意見,仲批評南區區議會冇做好監察嘅責任。南區區議會主席羅健熙聽到後隨即反彈,隔空喺社交平台話Horace身為行會成員,有份通過巴士加價,掉轉頭鬧區議會係咪精神分裂呢?

話說Horace早前批評服務南區嘅巴士公司未有同市民共度時艱,加價之餘又削減班次。另一方面佢又批評南區區議會並冇盡力做好監察,令區議會功能完全失效,市民喺巴士服務等重大民生事務失去保障,實在令人遺憾呀!

羅健熙就對Horace嘅指摘感到相當不滿喇,喺Facebook痛斥Horace身為行政會議成員,佢都有份通過巴士加價嘅申請,點可以將巴士加價歸咎於區議會把關不力呢?羅批評Horace係咪精神分裂,仲話建制派成日投訴區議會討論全港議題就係越權,依家又話想民主派主導嘅區議會阻止巴士公司加價,反問區議會嘅責任真係咁神奇咩?

Horace見遭到猛烈反擊,就回應話當區巴士班次大大減少、巴士線路縮減近一半,而區議會就完全冇反應嘅,批評嘅係區議會喺監管巴士服務方面並未盡責。Horace仲話羅嘅言論係轉移視線仲意圖卸責,其實就係唔想承認區議會冇做足監管工作喇。

至於巴士公司加價方面,Horace話前年香港發生反對修訂逃犯條例風波,隨即遇上新冠疫情,搞到最賺錢嘅機場線路冇人搭,呢兩年帳目太差,好難阻止加價。之不過,佢話政府有好大責任,應該盡早設立穩定車費嘅機制,同埋穩定香港嘅油價,避免巴士嘅車費隨油價突然飆升。另外,疫情期間巴士乘客雖然少咗,但班次依然咁多,政府早應讓其彈性處理,唔應該翹埋雙手乜都唔理囉!

東網網站 : https://on.cc/

東網Facebook專頁 : https://www.facebook.com/onccnews/

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0

留言 2

  • 展胴
    肯定係行政局封晒南區的泳灘,香港市民冇得搭巴士去游水,所以巴士公司先至冇生意要縮班加價。
    2021年04月30日15:28
  • 簡單啲講 兩個都係精神分裂
    2021年04月30日13:49
顯示全部