FI專欄｜朱太「中環醫生大廈」玩完 高永文唔夠照｜Louise

今年64歲的殼后朱太（ 朱李月華） 私有化金利豐（1031），一班中環名醫最關心就係舊年租用成幢金利豐中心，大鑼大鼓變身作「中環醫生大厦」嘅嘉仁醫療。上週五去到上址，接待處姑娘說：「無醫生係度啦，已關門一段時間了。」有位金融佬話：「兩個字形容，壯烈！」

話説舊年開張嘅「嘉仁醫療」，由一位建築佬做搞手，網攞到一班醫生，仲搵埋高永文來做生招牌，在中環插旗， 加埋金利豐朱太作為業主嘅號召力 ，成個格局就好似翠華（1314），譚仔（2217）上市前星光燿燿在中環開舖做「示範單位」咁。

好多醫生都想好似希瑪眼科(3309)林順潮醫生咁，自己有名氣加埋有濶佬客人如邢李㷧，郭炳聯等入股，再有朱太在背後發功，上市後就炒到如痴如醉咁喇。

之不過，今時唔同往日，交易所睇得好緊呢。好似藝人曾華倩個大佬，即呼吸糸統科名醫曾華德揸旗的「中卓醫療」，衝咗關幾次都上唔到市，最後要揾大佬照，七月以$4.67億賣俾中人壽(2628)做大股嘅康建(3886)。

中卓醫療位處醫生少林寺-中建大廈之內， 仲搵埋名人郭炳江家族 、周文軒個女周薇薇等名人入股，雖然好似曾華德咁嘅名醫，一年袋 $2000萬診金，但仍上唔到市，衰乜？衰班醫生唔出糧，靠分股息，咁嘅business model 就過唔到關。行家謔稱為「深圳劉德華」嘅嘉仁醫療又掂玩？一年多就要冚旗。

熟悉醫療集團運作嘅金融佬話 :「醫生如果好，遠遠都有病人搵你睇，唔係話係中環開診所就係好醫生! 再睇，嘉仁幢大厦入口又好鬼奇特， 接待處係地下大堂入口處，放滿醫生卡片，格局同傳統嘅名醫大廈如中建大廈及東英大廈好唔同，做醫療最緊要係條走廊同埋接待處 ，醫生間房唔使大。」所以「名醫大廈」唔係打造出來嘅。

講到尾醫療集團要做得起，必須有大佬照 。如霍建寧大佬霍建中醫生， 有盈康醫療， 淨係做長和喺嘅員工門診生意都夠做啦。 彤叔個女婿孫耀江嘅聯合醫務(722) 都做番新世界系員工嘅生意。所以嘉仁醫療揾高永文醫生，就未夠照喇。

註：專欄作者的觀點不代表本網立場。

Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen