〈人類群星閃耀時〉中詞英譯有玄機！連歌詞原作者小克都讚好

MIRROR嘅柳應廷聯同李駿傑一齊登上「THE FIRST TAKE」，獻唱《人類群星閃耀時》，前晚九點上線，經過24小時後view數突破53萬。唔少日本聽眾都有留言，除咗兩位歌手嘅演出之外，亦都要多得將中文歌詞譯做英文、日文嘅團隊。

今次負責將歌詞譯做英文，等識得英文嘅觀眾聽眾都可以了解到首歌意思嘅，係香港Sony Music國際部嘅兩位員工。佢哋認為翻譯雖然只係輔助，但關係到外國觀眾對廣東歌嘅理解，所似好認真、花咗好多心機去處理。而呢首中譯英嘅歌詞，仲得到咗中文歌詞原創作者小克喺IG讚賞！

小克嘅歌詞一向都要啲時間閱讀理解，翻譯團隊喺譯《人類群星閃耀時》時，先參考咗小克嘅創作筆記，然後做簡單嘅字面翻譯，再修正用字同埋文法，嘗試喺「準確表達歌詞意思」同埋「觀看影片時容易閱讀」當中拎個平衡。

「《人類群星閃耀時》描繪意境為主，關於感受表達嘅部份有好多留白，所以要喺消化字面意思之後，由畫面聯想出佢所展現嘅情緒，呢個係比較難處理嘅地方。咁啱團隊有一位有涉足身心靈嘅題材，另一位就有翻譯背景，所以喺理解以及文字表達上可以互補。」

想團隊講吓佢哋覺得最難譯嘅一句，但佢哋話其實好多都好難。「例如係『狂和妄堆砌傷痛 往沙堡送 多少破洞』。自己對於沙堡壘嘅聯想係脆弱、童年回憶，所以最終寫成『Arrogance and delusion lead to agony, Shaking foundations of fragile memories』。唔知有冇準確傳達到小克老師嘅意思？不過語言有趣嘅地方就係每人接收信息後嘅解讀都唔同。」

睇英譯歌詞時，嗰句「虛構中的我」譯咗做「The “I” in illusion」真係好crazy。團隊都話比較滿意呢一句。「有人話係神來之筆，我哋覺得係宇宙嘅安排。另一句『情存萬有才是美妙 / The everlasting love is the greatest gift of all』，我哋亦都覺得可以代表成首歌嘅中心思想。好高興能夠得到小克老師同觀眾嘅肯定。」

除咗「情存萬有才是美妙」，小克亦都好欣賞「子虛和烏有」譯成「Illusory and nonexistent」，仲好開心首歌嘅英文名可以用返書嘅英文譯名《Stellar Moments of Humankind》。

英文譯本歌詞同中文原歌詞已經做咗個對照，大家可以一路聽一路睇，一齊feel吓英語譯本嘅感覺。至於歌詞嘅日語譯本，原來係日本嗰邊派人base on英文譯本去譯，唔知識得日文嘅觀眾聽眾們覺得如何？

撰文：方以文