LEGO有機會推出菲林相機？ 可自行手動組裝影到相

菲林相機都興咗好耐啦，文青可以話係人手一部，但大家又會唔會想擁有一部真係自己親手砌出嚟嘅菲林相機呢？LEGO Ideas計劃係畀大眾設計LEGO產品，有1萬人支持同經過審批就有機會製作實物推出，最近就有人出咗一個用LEGO積木砌一部真係用到嘅菲林相機嘅計劃啊！

相機嘅製造者Zung92話佢嘅目標係利用現有嘅LEGO零件，去整一部功能完整嘅35mm菲林相機，部機仲要保持價錢合理同夠小巧，可以便於攜帶，佢亦都話當初為咗令機身唔會漏光，都花咗幾日時間去研究。ZH1 LEGO相機由595個Lego組成，相機鏡頭用咗LEGO現有嘅放大鏡片，另外亦都設計咗一枝針孔鏡頭，相機包括真係可以運作嘅快門掣、過片桿、捲片軸同冷靴插頭。唔好以為佢係Lego砌出嚟就會好渣啊，相機仲支援全片幅同半片幅嘅拍攝模式㗎，仲有參考一啲復古菲林相機，設計咗放菲林外盒紙卡嘅窗口仔，真係一啲細節都唔放過！

不過呢部相機係咪真係可以順利生產出嚟仲係一個未知之數，目前ZH1 LEGO已經喺LEGO Ideas得到10,000位支持者，但之後仲要經過Lego專家嘅評審，睇下適唔適合製成真實嘅LEGO產品。有得玩又有得影，攞嚟自用同送禮都一流啊！如果最後真係可以順利生產，你又會唔會想買返部嚟玩下呢？

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/