曾遭愷爸爸迫婚！小豬被爆成日上愷樂屋企

台灣舞王羅志祥（小豬）同內地網紅周揚青分手，爆小豬同旗下女藝人有不正當關係，令人直指係愷樂（蝴蝶姐姐），繼之前有網友翻出佢接受台灣主持人小S同蔡康永嘅邀請，喺節目《花花萬物2》大晒更衣室，大爆成排名牌袋係由小豬送畀佢嘅生日禮物。今日又有網友偵探上身，搵番2011年小豬喺台灣節目《娛樂百分百》其中一集，幫愷樂（蝴蝶姐姐）慶祝生日，搵嚟唔少朋友同粉絲出席，連愷樂爸爸亦係嘉賓之一，但估唔到愷樂爸爸語出驚人，一見到小豬竟然問佢，幾時會娶佢個女：「甚麼時候下聘？」隨即小豬聽完畀唔識反應，愷樂即打完場：「爸爸好愛做效果！」最後小豬隔咗一陣，先識得畀反應：「蝴爸爸變得不一樣啦！」但愷樂爸爸轉過頭講：「我認錯人啦！」化解呢個「迫婚」事件。

之後又有網友翻出2015年愷樂同爸爸一齊上節目《食尚玩家》，當主持人莎莎問愷樂爸爸：「她有沒有跟羅志祥在一起？」愷樂爸爸即答：「看過羅志祥去我家很多天。」令愷樂傻笑完全唔知點算好。

東網網站 : https://on.cc/

東網Facebook專頁 : https://www.facebook.com/onccnews/