ViuTV近年的原創劇、綜藝節目備受讚賞,當中由MIRROR成員Lokman、Frankie及Stanley擔正的新劇《IT狗》未出街已經被一眾「鏡粉」做勢力推,去到劇集於上星期首播後更因為劇情抵死又貼地而引起共鳴,成為開台以來收視第二好的原創劇!
昨晚播出一集,劇組大膽向「發哥」周潤發及狄龍主演的經典港產片《英雄本色》致敬,陳湛文同凌文龍重演發哥在戲中落難後被好兄弟狄龍見到一幕,不少觀眾睇完都有感「回憶返曬嚟」,仲眼濕濕,陳湛文昨晚出PO透露拍這場戲全個劇組都既緊張又期待:「正正因為佢係《英雄本色》、正正因為佢係狄龍、正正因為佢係周潤發,佢哋都係站於香港電影界一個好重要嘅位置,呢一幕係簡導由衷想向《英雄本色》致敬嘅一筆。能夠成為向經典致敬嘅一員,喺感動萬分之餘,伴隨住嘅係見到一種曙光……因為曾經有一段時間,紛紛眾說「青黃不接」,我唔敢講我哋接到/接咗棒,但我想講而家已有一班傻佬傻婆不繼咁開拓、探索緊一個未知嘅新世界。」見到他們拍攝時專誠開住兩個螢幕做比較,務求令每個細節位都拍到一模一樣,認真到爆。
另外,昨晚有幕講凌文龍為了討好彭秀慧將整個公司貼滿馮德倫的海報,沒想到成功引到「當事人」馮德倫在自己IG留言,大讚劇集好睇,仲話:「下次不要用我的相片,直接請我出演。」為劇集打了大支強心針,亦有網民發現之前劇集邀請前「財爺」曾俊華客串,原來當年財爺真的有同過星之子一起去科學園出席活動,大讚ViuTV「無吹水」,製作用心。