iPhone可自行更換電池？傳Apple研發新技術對抗歐盟新法規

無錯！又係有關歐盟既消息呀！今次又係同科技巨頭對着幹，但可能都有讀者覺得係好消息。事關歐盟上年生增咗《電池法》，有傳Apple為咗配合歐盟嘅新法規，決定開發新技術，令iPhone換電池更加方便！

歐盟嘅《電池法》規範2027年起要求電子產品可以簡單方便咁更換電池，消費者唔需要專業工具就可以自行更換。根據《The Information》報導指知情人士爆料話Apple為咗配合呢個《電池法》，研發緊一個叫「電誘導黏合劑脫黏」嘅新技術，簡單啲嚟講就係改用金屬包住電池，只要對電池施加少少電流就可以拆出嚟，相比起依家需要用工具慢慢拉除電池固定膠，的確係比較簡易，但對一個普通人嚟講，似乎拆卸嘅方法仲未夠簡單直接喎！

雖然有新技術，但為咗操作嘅安全性同埋設備嘅完整性，Apple仍然建議使用者去官方維修中心先好換，唔知歐盟又收唔收貨呢？呢項技術研發順利嘅話，有傳最快可以喺今年Apple即將發佈嘅iPhone 16見到，慢則下年嘅iPhone 17就會推出，大家又期唔期待加入呢個新技術嘅iPhone呢？

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/