新民黨主席兼立法會議員葉劉淑儀(葉劉)自2015年到車公廟參拜時遭麒麟撞飛後，運勢一直平平，新一屆區議會選舉新民黨更是「全軍覆沒」，尋日(15日)葉劉就遠赴沙頭角荔枝窩出席十年一屆嘅太平清醮誌慶。期間就有舞獅及舞麒麟表演，而今次麒麟似乎對佢唔錯，冇再將佢撞飛，反而甚為友善，咁樣係咪好意頭?
葉劉今日(16日)喺Facebook貼文分享，話太平清醮誌慶係當地盛事，而且需要去到沙頭角禁區，搭半小時船程到達荔枝窩，攀山涉水咁濟。除咗村民及嘉賓到場外，亦有唔少海外華僑特登番嚟參加慶典，現場大大話話超過1000人，場面十分熱鬧嘞！佢仲特別提到當晚有好多表演，包括客家功夫、神功戲等，不過最開心都係舞麒麟表演時，麒麟表現友善，更送上「有緣相聚」的揮春及迎送佢入村咁話。
唔少網民紛紛留言，有人話「葉太小心，唔好被麒麟撞到」、「姐姐小心又畀神獸撞親」、又有人提醒佢「唔好行近隻舞獅到啊，又撞走你就唔好啊」，睇嚟大家都好關心佢嘞！
東網網站 : https://on.cc/
東網Facebook專頁 : https://www.facebook.com/onccnews/
留言 0