MIRROR新關注組13.5萬人加入吐苦水 姜濤向「苦主」致歉

「我老婆嫁咗比Mirror導致婚姻破裂關注組」Facebook 專頁，開咗唔夠一星期就有13.5萬人加入，版主接受本地媒體訪問時透露，佢自己都估唔到有咁大反應，而姜濤、柳應廷（Jer）、林家謙同Tyson Yoshi噚日出席《903拉闊音樂會2021—風火雷電》招待會時，姜濤竟公開向「苦主們」致歉。

講到有網民在Facebook開設名為「我老婆嫁咗比Mirror導致婚姻破裂關注組」專頁，有「苦主」出post公審另一半，包括在家中以姜濤巨型海報當牆紙、逼老公着姜濤同款衫、發開口夢叫「Jer Jer」等，被指導致婚姻破裂。

有Fasn喺屋企貼姜濤牆紙

姜濤受訪時對此表示歉意，話如果影響到大家夫妻關係，佢都覺得唔好意思，「對唔住你哋，冇諗過影響大家咁多」。原來佢都有睇個Page，姜濤仲大讚其中一個post嘅牆紙靚，問喺邊度買，又希望粉絲老公都聽吓MIRROR啲歌，可能「老公們」會鍾意呢。

而同場嘅柳應廷（Jer）就認為呢件事係笑料一則，可以當係茶餘飯後嘅娛樂活動，佢仲爆自己都有入group「食花生」，。另外，佢哋亦幫「老公們」爭取權益，表示反對粉絲要老公上繳政府消費券用喺MIRROR身上，認為大家應該要經濟自由，想買啲咩由自己決定。

圖片來源：我老婆嫁咗比Mirror導致婚姻破裂關注組＠Facebook、姜濤、柳應廷＠Instagram